Бош прокуратура ҳузуридаги департаментнинг Сирдарё вилоят бошқармаси, вилоят ДХХ ва ИИБ бошқармалари ходимлари билан ҳамкорликда ўтказилган тезкор тадбирда бир ёшли боласини 17 минг долларга сотмоқчи бўлган аёл қўлга олинди.
Маълумотларга кўра, тадбирда махсус харидор сифатида иштирок этган тезкор ходим М.Х. Гулистон туманида туғилган 25 ёшли фуқаро А.Ў.нинг болани сотиб олишга келишган. 21 июль куни А.Ў. Гулистон шаҳри Халқлар дўстлиги кўчасида жойлашган «Шоҳрух» меҳмонхонаси олдида фарзандини 17 минг доллар эвазига «харидорга» сотган.
Аёл бола эвазига кимёвий ишлов берилган 17 минг долларини олиб, бу ҳақда тилхат ёзиб берган вақтида ашёвий далиллар билан ушланган.
Мазкур ҳолат юзасидан департаментнинг Сирдарё вилоят бошқармаси томонидан терговга қадар текширув ҳаракатлари олиб борилмоқда.
Аввалроқ Сирдарё вилоятининг Гулистон шаҳрида бир ойлик чақалоқни 18 минг долларга сотмоқчи бўлган аёллар қўлга олинганди. Навоийда эса 23 кунлик чақалоғини 3 миллион сўмга сотмоқчи бўлган аёлга жиноий иш очилган. 14 июль куни Сурхондарёда фарзандини қонуний йўл билан бошқа аёлга беришдан бош тортиб, уни сотмоқчи бўлган аёл ушланган.
Изоҳ (0)