Туркиялик таниқли хонанда ва актёр Эмраҳ 6 йиллик турмушидан сўнг рафиқаси билан ажрашмоқда

Туркиялик таниқли хонанда ва актёр Эмраҳ Эрдўғон турмуш ўртоғи Сибел Эрдўғон билан ажрашмоқда, деб ёзади Туркиянинг Sabah нашри.

Қайд этилишича, ажрашиш ташаббускори айнан Эмраҳ ҳисобланади. У аслида январь ойида ушбу қарорга келган.

Жуфтлик 2014 йилда турмуш қурган. Уларнинг бир ўғил ва бир қиз фарзанди бор. Сўнгги вақтларда оммавий ахборот воситаларида Эмраҳнинг оиласидаги нотинч вазият ҳақида маълумотлар чоп этилган, бироқ у бундай гап-сўзларни инкор қилган.

Ҳозирда эса ажрашиш жараёни бошланганини Эмраҳнинг ўзи тасдиқлаган, бироқ ҳолатни изоҳлашдан бош тортган.

Эмраҳ 2019 йилда санъатни тарк этганини маълум қилган. У Туркия ҳамда хорижий мамлакатларда кўчмас мулк агентликларини очган.

Маълумот учун, Эмраҳ Эрдўғон 1971 йилда Туркиянинг Диёрбакир шаҳрида туғилган. У фаолияти давомида 10 дан ортиқ альбом ёзган, 8 та фильмда суратга тушган. Эмраҳ Туркиядан ташқари Саудия Арабистони ҳамда Озарбайжонда ҳам жуда машҳур.