Тингланг, муҳокама қилманг. Тушкунликдаги яқин инсонингизга бера олишингиз мумкин бўлган ёрдам

Инсон баъзи вақтда ўзини ёмон ҳис қилиши, тушкунликка тушиши мумкин. Бундай вақтда ҳамма ҳам психологга мурожаат қилавермайди ва ичига ютади. Лекин муаммо, дард ва кўнгилсизликларни бошқа биров билан бўлишмаслик, ичида сақлаш саломатлик ва асаб тизимининг ишдан чиқишига, жиддий касалликларга олиб келиши мумкин. Яқин инсонингиз шундай аҳволда эканини сезган бўлсангиз, сизга дардини айтиши мумкинлигини англатиб, қуйидаги тавсияларга амал қилинг.

Диққат билан тингланг

Яқин инсонингиз уй, иш, шахсий ҳаётидаги муаммолар сабаб ўзини ёмон ҳис этаётган бир вақтда сиз билан ҳаммасини бўлишишни истаса, уни диққат билан тинглашнинг ўзи билан унга анча ёрдам бера олиши мумкинлигини унутманг. Бошқа инсонлар қолиб, сизга ўз муаммоларини англатяптими, демак, сизни ростан ҳам ўзига яқин олади. Инсон стрессга тушганида дардини бўлиша оладиган, тинглайдиган инсоннинг бўлиши ўзини анча енгил ҳис қилишга сабабчи бўлади. Тинглаш давомида уни муҳокама қилманг.

Гапини бўлманг

Суҳбат давомида инсон ҳолати яхши эмаслигидан ҳис-туйғуларини тушунтириб беролмаслиги, ифодаловчи сўз тополмаслиги ёки бироз муддат сукут сақлаб қолиши мумкин. Бундай вақтда у инсоннинг гапларини бўлманг, дардини ўзи истаганидек англатишига қўйиб беринг.

Мотивация беринг

Яқин инсонингиз руҳий ҳолатидан келиб чиқиб, қалбидагиларни англатаётган вақтда уни юпатишга урининг, лекин ошириб юборманг. Ҳаётда ҳамма нарса бўлиши мумкин эканлиги, бундан аввал ҳам муаммолар бўлгани ва ўтиб кетгани, бу галгиси ҳам вақт ўтиб унутилишини тушунтиринг. Ҳаёт паст-баландликлардан иборатлиги, асосийси, бундай вазиятдан кейин инсоннинг тўғри хулоса чиқариб, кучли бўлиши кераклигини билдиринг. Ҳозир эмоцияда экани ва бу табиий ҳоллиги, лекин қарор қабул қилиш учун тиниқиб ухлаб, қорнини тўйдириб, ҳеч ким йўқ жойда маълум фикрга келиши кераклигини билдиринг.

Баҳо берманг

Суҳбатдошингизни тинглаш давомида воқеани борича тингланг, вазиятнинг яхши-ёмон, оқ ва қора томонларини ҳозир муҳокама қилишга, баҳо бериша ошиқманг, яқин инсонингизни туйғуларини ҳис қилишга урининг. Суҳбатдошингизга бундай вақтда «мен сени тушунаман» жумласи ҳам яхши юпанч бўла олади, фақат айтилиши керак бўлгани учунгина эмас ростан ҳам ҳис қилиб тушуниш ва буни суҳбатдошга англатиш керак. Тушкунликка тушган одам ўзини ёлғиз ҳис этмаслиги керак, ёнида уни тушунадиган қўллаб-қувватлайдиган инсонлар бор эканини билиши ўзида куч топишига сабаб бўлади.