Франциянинг «Монако» клуби раҳбарияти жамоа бош мураббийи Роберт Моренони истеъфога чиқаришга қарор қилди. Бу ҳақда L’Equipe хабар бермоқда.
Франция чемпионатининг 2019/20 йилги мавсум якунларига кўра, «Монако» 40 очко тўплаган ҳолда, 9-ўринни эгаллади.
Морено 2019 йилнинг 28 декабридан бери клубни бошқариб келаётганди.
Манбанинг хабарига кўра, Моренонинг ўрнини «Бавария» собиқ бош мураббийи Нико Ковач эгаллаши кутилмоқда. «Бавария» унинг қўл остида (2018/19 йилги мавсумда) Германия чемпионати, мамлакат Кубоги ва Суперкубогида ғалаба қозонган.
Шунингдек, клуб бир қатор футболчилар билан ҳам ўзаро келишиб олишни режалаштирмоқда. Маълумки, «Монако» Францияда ПСЖдан кейин футболчиларга маош тўлаш бўйича иккинчи ўринда туради, шунинг учун клуб яхши таклифлар чиққан тақдирда, бир қатор ўйинчиларни сотишни режалаштирмоқда. Бенуа Бадиашиле, Виссам Бен Йеддер, Бенямин Ҳенрикс, Юссуф Фофана ва Фоде Балло-Туре шулар жумласидандир. Бундан ташқари, клуб ижарага берилган футболчилардан ҳам қутулиши мумкин.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)