«Реал» собиқ дарвозабони Икер Касильяс Мадрид клубига қайтади.
39 ёшли испаниялик «қаймоқранглилар» президенти Флорентино Пересга маслаҳатчи бўлади, дея хабар қилмоқда Marca.
Касильяс «Реал» тарбияланувчиси ҳисобланиб, 1999—2015 йиллар мобайнида асосий жамоа шарафини ҳимоя қилган. Сўнгги беш йилни Икер «Порту»да ўтказди.
2019 йилнинг май ойида Касильяс «Порту» машғулотлари вақтида юрак хуружини бошдан кечирди. Шундан кейин у расмий ўйинларда иштирок этмади ва қишда футболчилик фаолиятини якунлашини маълум қилди.
Маълумот учун, «Қироллик клуби»нинг айни дамдаги бош мураббийи Зинедин Зидан ҳам футболчилик фаолиятини якунлагандан кейин «Реал»да президент маслаҳатчиси лавозимида иш бошлаган. Кейинчалик спорт директори, иккинчи жамоа устози ва бош мураббий ёрдамчиси лавозимларида ишлаган Зизу 2016 йилнинг январида жамоа бош мураббийига айланганди.
«Реал» 2019/20 йилги мавсумда Испания Ла Лигаси ғолибига айланди. Мадридликлар мусобақа тугашига бир тур қолганида энг яқин таъқибчиси «Барселона»ни 7 очко ортда қолдириб, 34 марта чемпионликни қўлга киритди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)