Хитойда сўнгги суткада коронавирус билан касалланиш бўйича 10 та ва касаллик белгисиз ўтаётган 5 та ҳолат аниқланди, беморларнинг 18 нафари соғайди, деб хабар бермоқда «РИА Новости» Хитой Соғлиқни сақлаш миллий комиссиясига таяниб.
Қайд этилишича, аниқланган янги касалланиш ҳолатининг бири мамлакатнинг ўзида, қолган 9 таси четдан юқтирилган.
Мамлакатда умумий ҳисобда 83 622 киши коронавирусга чалинган, уларнинг 78 737 нафари соғайган, 4634 нафар бемор COVID-19 қурбонига айланган. Касалхонада 251 киши даволанишда қолмоқда.
Шунингдек, Хитойда касаллик белгисиз ўтаётган 5 та ҳолат аниқланган. Шундай кишиларнинг яна 104 нафари кузатувда бўлиб турибди.
Жанубий Кореяда эса сутка давомида 60 киши коронавирусга чалингани қайд этилиб, касалланганларнинг умумий сони 13 672 нафарга етди.
Мамлакатда касалланиш ҳолатлари яна ошди. 16 июль куни 61 киши, 15 июль куни 39 киши, 14 июль куни 33 киши коронавирусга чалингани қайд этилганди.
Аниқланган янги касалланиш ҳолатларининг 39 тасида вирус четдан юқтирилган. Шундан 25 таси аэропортлар ва денгиз станцияларида мамлакатга келганлар орасида аниқланган.
Жонс Ҳопкинс маълумотларига кўра, сутка давомида 64 киши соғайиб, тузалганларнинг умумий сони 12 460 нафарга, вирус қурбонлари сони 4 кишига ошиб, 293 нафарга етди.
Изоҳ (0)