«Қизилқум» футбол клуби бош мураббийи Тачмурод Агамуродов Coca-Cola Суперлига 9-тури доирасида «Навбаҳор»га қарши кечган ўйиндаги мағлубиятга (0:1) шарҳ бериб ўтди.
«Жамоам кўрсатган ўйиндан қониқдим. Майдонда қўлдан келганича курашишди. «Навбаҳор» чемпионатимизнинг етакчи жамоаларидан бири саналади. Рақиб юқори ўринлар ва Чемпионлар Лигаси чун курашмоқда. Биз эса ҳозирча жон сақлаб қолиш йўлида кураш олиб боряпмиз. Олдимизга қўйилган вазифа йўлида ҳаракат қиламиз. Мазкур ўйинда биргина пенальти барчасини ҳал қилди.
Ҳа, жамоани оғир аҳволда қабул қилиб олдим. Боз устига тақвим ҳам биз учун бироз ноқулай эди. Рестартдан сўнг юқори ўринлардаги жамоалар билан ўйнадик. «Пахтакор», ОКМК ва ҳоказо. Лекин, жамоам ҳаракат қилмоқда. Оғир вазиятдан чиқиб олиш учун интилмоқда. Агар биз шундай бор кучимиз билан интилишда давом этсак, тушкун ҳолатдан чиқиб кета оламиз. Трансферлар ойнаси вақтида жамоамизни кучайтириш учун янги футболчиларни таклиф қиламиз. Яхши футболчиларсиз идеал мураббий ҳам натижа қила олмайди.
«Навбаҳор»ни ўйини ҳақида бирор бир фикр билдиришим учун мен шу жамоани ичида бўлишим керак. Бугунги ўйини ҳақида гапирадиган бўлсам, ҳакам пенальти белгилашда нотўғри қарор чиқарди деб ўйлайман (ўйинни Жасур Мухторов бошчилигидаги ҳакамлар гуруҳи бошқариб борди — изоҳ «Дарё»). Албатта, ҳакамларни назорат қиладиган қўмита бор. Мени ягона эътирозим шу вазиятга. Икки футболчини боши билан тўқнашиб кетиши сабаб ўйинни тўхтатиш ноўрин. Ҳакам қўйиб бериши керак эди», — дея Агамуродов сўзларини келтирмоқда «Championat.asia».
9-турдан сўнг «Қизилқум» 2 очко билан 13-поғонада бормоқда. Жамоа келаси турда яна бир аутсайдер «Бухоро»ни меҳмон қилади.
Мавзуга доир: Андрей Канчельскис: Исмини айтиб ўтирмоқчи эмасман, аммо айрим футболчилар ўзига ўхшамаяпти
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)