Қирғизистонда ўтган бир сутка ичида икки киши коронавирусдан, яна 45 киши — пневмониядан вафот этди, дея маълум қилди ССВ жамоат саломатлиги бошқармаси бошлиғи Айнур Акматова.
Соғлиқни сақлаш вазирлиги маълумотларига кўра, коронавирусдан вафот этган беморларнинг бири 58 ёшли эркак бўлса, иккинчиси — 67 ёшли аёл. Ҳозирда бутун мамлакат бўйлаб коронавирус қурбонлари сони 149 кишига етган.
Шунингдек, ўтган бир сутканинг ўзида Қирғизистонда 45 киши пневмониядан вафот этган. Қурбонларнинг 22 нафари Бишкек шаҳри ҳисобига тўғри келмоқда, яна 23 киши эса — республиканинг бошқа ҳудудларида. Мамлакатда 2020 йилнинг мартидан буён пневмониядан вафот этганлар сони 497 кишига етди.
14 июль ҳолатига кўра, Қирғизистонда яна 421 кишида коронавирус аниқланган. Коронавирусга чалинган янги касалларнинг 176 нафари Бишкек шаҳри ҳисобига тўғри келмоқда. Шунингдек, қуйидаги ҳудудларда ҳам коронавирус билан касалланиш бўйича янги ҳолатлар қайд этилган:
- Чуй вилояти — 87;
- Ўш шаҳри — 58;
- Ўш вилояти — 6;
- Иссиқкўл вилояти — 31;
- Жалолобод вилояти — 40;
- Норин вилояти — 1;
- Боткен вилояти — 21;
- Талас вилояти — 1.
Аввалроқ 9 июлда Қирғизистон бош вазири барча тиббиёт ходимларини таътилдан чақириб олишни буюргани, 10 июлда Қирғизистон соғлиқни сақлаш вазирида пневмония, унинг ўринбосарида коронавирус аниқлангани, Бишкекдаги тез ёрдам ходимларининг чорак қисми COVID-19 ва пневмония билан касаллангани тўғрисида хабар берилганди.
Мавзуга доир: Қирғизистонда коронавирусга чалинган беморлар даволанаётган касалхона шифокорларсиз қолди (видео)
Изоҳ (0)