Фарғона вилоятининг Сўх тумани муаммоларини бартараф этишга сарфланадиган маблағларнинг маҳаллий бюджетга таъсири йўқ. Бу ҳақда Фарғона вилояти ҳокимининг молия-иқтисодиёт ва камбағалликни қисқартириш масалалари бўйича ўринбосари Мирзоҳид Убайдуллаев «Дарё» мухбири Мусулмонбек Иброҳимовга берган қисқача интервьюсида айтиб ўтди.
Президент Шавкат Мирзиёевнинг июнь ойида Фарғона вилоятига ташрифи чоғида Сўх туманини иқтисодий-ижтимоий ривожлантириш учун 100 миллиард сўм ажратиш белгиланган. Ушбу маблағлар сув қувурларини тортиш, йўлларни таъмирлаш каби иижтимоий муаммоларни ҳал этишга йўнатирилиши режалаштирилган.
«Сўх туманидаги муаммоларни бартараф этишга республикадан ажратилган маблағлар етади. Бу вилоятнинг маҳаллий бюджетига ҳеч қандай таъсир ўтказмайди. Ҳозирги кунда туманни ижтимоий-иқтисодий ривожлантиришга қаратилган Президент қарори лойиҳаси тайёрланмоқда. Бош вазир бошчилигида бош вазир ўринбосарлари ва масъул идора раҳбарлари ҳар бир йўналиш бўйича нималар қилиниши ва қанча маблағ ажратиш юзасидан таклифлар ишлаб чиқди», — деди вилоят ҳокими ўринбосари Мирзоҳид Убайдуллаев.
Ҳоким ўринбосарининг таъкидлашича, туман аклав ҳудудда жойлашгани боис ишлаб чиқариш, саноат соҳасида кўрсаткичлари паст. Шуни ҳисобга олиб, қарор лойиҳасида туманда ишлаб чиқарувчилар учун солиқ имтиёзлари бериш кўзда тутилган. Бу орқали ҳам четдан, ҳам вилоятдан инвесторлар жалб қилинади.«Туманда цемент, қум, тош, гипс, ангдиривд каби қурилиш материалларига ресурс катта. Ҳозирда мева ва сабзавот маҳсулотларининг атиги 10-15 фоизи қайта ишланяпти. Ишлаб чиқилган қарорда 450 миллиард сўмлик лойиҳаларни ишга тушириш кўзда тутилган. Агар ушбу лойиҳалар ишга тушса, ҳам мева ва сабзавот маҳсулотларини, ҳам қурилиш маҳсулотларини ишлаб чиқаришда анчагина ўзгариш бўлади. Йўлларни яхшилаш мақсадида цементобетон йўлларни қуриш учун жами 20 миллиард сўмга яқин маблағ сарфланади. Шунингдек, тумандаги Қайроқ массивига сув тортиш ҳам режалаштирилган бўлиб, бу билан массивда 2 минг гектардан ортиқ ерлар ўзлаштирилади», — деди Убайдуллаев.
Вилоят ҳокмилиги берган маълумотларга кўра, Сўх тумани маҳаллий бюджетига йилига 52 миллиард сўм маблағ келиб тушади ва бу вилоят бюджетининг 1,5 фоизини ташкил этади. Тушумлар тумандаги мактаб, боғча, пенсиялар – маҳаллий харажатларнинг 50 фоизини қоплашгагина етади. Қолган харажатлар вилоят бюджетидан тўлаб берилади.
Эслатиб ўтамиз, Ўзбекистон—Қирғизистон чегарасида жойлашган Чашма булоғи олдида 31 май куни икки мамлакат фуқаролари ўртасида зиддият келиб чиққан. Ўзбекистон бош вазири Абдулла Арипов 1 июнь куни воқеа юз берган жойга ташриф буюриб, аҳоли билан учрашган.
Абдулла Арипов Қирғизистон расмийлари билан ҳодиса юзасидан музокара олиб борган. Шу куни Ўзбекистон ва Қирғизистон президентлари мазкур ҳодисани телефон орқали муҳокама қилган. Можаро оқибатида 187 нафар ўзбекистонлик касалхонага ётқизилган, Ўзбекистон томонда учта хонадон ёниб кетган. Қирғизистоннинг Боткен вилоятида эса уй ва омборхонада ёнғин содир бўлган, шунингдек, 25 киши жароҳат олган.
Мазкур воқеалар ортидан Ўзбекистон ҳукумати аъзолари ҳудуддаги муаммоларни ўрганиш учун 2 июнь куни у ерга ташриф буюрган. Сўх туманига янги ҳоким ва ички ишлар бўлимига янги раҳбар тайинланганди.
Изоҳ (0)