Қашқадарё вилоятининг Чироқчи туманида «ДАФ XF 105» русумли юк автомашинаси ва Orlando тўқнашди. Икки киши воқеа жойида вафот этди. Жароҳат олган олти нафар йўловчи эса Республика шошилинч тиббий ёрдам илмий маркази Қашқадарё филиалига олиб борилган. Бу ҳақда «Дарё»га вилоят соғлиқни сақлаш бошқармаси ахборот хизмати раҳбари Нуриддин Эгамов маълум қилди.
Қашқадарё вилоят ИИБ ЙҲХБ ахборот хизмати раҳбари Жавлон Бахтиевнинг қўшимча қилишича, воқеа 2020 йилнинг 12 июль куни 00:20 да Чироқчи тумани ҳудудида содир бўлган.
Маълум бўлишича, Чироқчи тумани ҳудудидан ўтувчи 4R 87 автомобиль йўлининг 47-километрида, Хоразм вилояти Хонқа туманида яшаган ҳайдовчи М.М. бошқарувидаги Orlando иккинчи даражали йўлдан келишига қарамай «Йўл беринг» белгисига ва светофорнинг қизил чироғига амал қилмаган ҳолда ҳаракатини давом эттирган ва асосий йўлдан келаётган Чироқчи туманида яшовчи ҳайдовчи бошқарувидаги «ДАФ XF 105» русумли юк автомашинаси билан тўқнашган.
Натижада Orlando ҳайдовчиси М.М. ва йўловчи Т.Ж. воқеа жойида вафот этган.
Қашқадарё вилоятининг Деҳқонобод туманида яшовчи 1992 йилда туғилган Қ.Д., Хоразм вилояти Урганч туманида яшовчи 1983 йилда туғилган А.Ш., 1986 йилда туғилган Қ.Н., 2010 йилда туғилган Ж.Ш., 2013 йилда туғилган Ж.Н. ва 2016 йилда туғилган Ж.Д. олган тан жароҳати сабаб шифохонага ётқизилган.
«Тўрт нафари оғир, икки нафари ўрта оғир бўлган беморлар стандарт бўйича текширувдан ўтказилган, зарур тиббий ёрдам кўрсатилмоқда», — дейилади вилоят соғлиқни сақлаш бошқармаси ахборот хизмати берган маълумотда.
Эслатиб ўтамиз, аввалроқ Бухорода 2020 йил 7 июль куни тонгги 05:25 да содир бўлган тез ёрдам машинаси иштирокидаги авария ҳайдовчининг уйқусираши оқибатида содир бўлгани ва икки нафар киши вафот этгани маълум қилинганди. Жиззахда Nexia ва Damas тўқнашиши оқибатида эса икки киши ҳалок бўлгани, яна уч нафар фуқаро жонлантириш бўлимидалиги хабар берилди. ЙТҲлар сони кескин ортгани сабаб Бухорода ҳайдовчилар хушёрлигини ошириш мақсадида А-380 трассасига ЙТҲга учраган машина макети ўрнатилди.
Изоҳ (0)