Бухоро вилоятининг Ғиждувон туманида Lacetti ҳайдовчиси маст ҳолда велосипед бошқарган отахонни уриб юборди. Бу ҳақда «Дарё»га вилоят ИИБ ЙҲХБ ахборот хизмати раҳбари Улуғбек Шукруллаев хабар берди.
Маълум қилинишича, воқеа 2020 йилнинг 8 июль куни соат 14:50 да М-37 Самарқанд—Бухоро—Туркманбоши йўлида содир бўлган.
Ғиждувон туманида яшовчи Lacetti ҳайдовчиси Ш.Ю. ҳаракати давомида кутилмаганда йўлнинг асосий қисмига чиқиб қолган велосипедчини уриб юборган. 70 ёшли отахон бош мия чайқалиши, ўнг оёғининг очиқ жароҳатланиши ташхиси билан шифохонага ётқизилган. Аммо кўрсатилган ёрдамга қарамасдан вафот этган.
Аниқланишича, велосипедни бошқариб келаётган шахс маст ҳолатда бўлгани учун бошқарувни йўқотган.
Ҳолат юзасидан айни пайтда тергов-суриштирув жараёнлари давом этмоқда.
Июль ойи бошидан буён Бухорода одам ўлими билан боғлиқ ЙТҲлар сони ортди. Дастлаб Пешку туманида Cobalt ва юк машинаси иштирокида юз берган йўл-транспорт ҳодисаси оқибатида уч киши вафот этган бўлса, 25 ёшли аёл Damas’нинг эшак аравага урилиши оқибатида жон берди. 7 июль куни Damas русумли тез тиббий ёрдам автомашинаси иштирокида содир этилган аянчли ЙТҲда икки киши ҳалок бўлгани хабар қилинди. Бу каби ЙТҲлар сонини камайтириш ва ҳайдовчилар ҳушёрлигини ошириш мақсадида вилоят ҳудудидан ўтган А-380 трассасига ЙТҲга учраган машина макети ўрнатилди.
Изоҳ (0)