Фарғона вилояти Тошлоқ тумани маъмурий суди томонидан Тошлоқ туман кенгаши депутати ҳамда «Тошлоқ деҳқон бозори» МЧЖ раҳбари ҳисобланган А.Тошматовга нисбатан юритилган маъмурий ишни кўриб чиқди, деб хабар беради ЎзА.
Иш ҳолатига кўра, тумандаги «Хўжаариқ» маҳалла фуқаролар йиғини раиси М.Зокирова 24 март куни йиғин маъмурий биноси олдида савдо қилиб ўтирган О.Ҳайдарованинг маҳалла биносига кириш эшигини сотувдаги буюмлари билан тўсиб қўйганидан ғазабланган. Кийим-кечакларини тепиб ташлаб, уятли сўзлар билан сўкиниб, бақир-чақир қилиб, фуқароларнинг тинчлиги ва осойишталигини бузган ҳолда майда безорилик содир этган.
Шундан сўнг воқеа жойига бозор раҳбари А.Тошматов етиб келиб, М.Зокирова билан жанжаллашиб кетган. Жанжал давомида А.Тошматов жамиятда белгиланган юриш-туриш қоидаларидан четга чиқиб ва жамоат тартибини менсимасдан, бошқа фуқароларнинг олдида М.Зокировани «халқ душмани» деб ҳақорат қилган. Гўёки, ким, қаерда, қандай савдо қилишини ўзи белгилаб беришини маълум қилиб, савдо ишларини давом эттиришни уқтирган.
Бундан ташқари, А.Тошматов жанжал давомида М.Зокировага муқаддам тол дарахтини кестириб юбориб, жавобгар бўлишида гўёки пора бериб қутулгани ҳақида гапириб, унга туҳмат қилган.
«Суд иш ҳолатларини ҳар томонлама таҳлил қилиб, барча тарафларнинг ҳаракатларига баҳо берди. А.Тошматовнинг хатти-ҳаракатлари М.Зокированинг шахсига эмас, балки жамиятда ўрнатилган тартиб-қоидалар, давлат органлари ва фуқароларнинг ўз-ўзини бошқариш органларининг нормал иш фаолиятига қарши қаратилиб, безорилик ҳиссиётлари замирида содир этилган деб ҳисоблаб, унинг ҳаракатларини ҳақорат қилиш эмас, балки безорилик деб баҳолади. Унга нисбатан Маъмурий жавобгарлик тўғрисидаги кодекснинг 40-моддаси ва 183-моддалари билан узил-кесил ўташлик учун маъмурий қамоқ жазосини тайинлади», — дейди Тошлоқ туман маъмурий суди раиси Аброрхон Акрамов.
Шу билан бир қаторда суд маъмурий ишнинг бошқа иштирокчилари ҳаракатларига ҳам қонуний баҳо бериб, тегишли тартибда жазо ва бошқа чораларни қўллаган.
Изоҳ (0)