Қозоғистон президенти Қосим-Жўмарт Тўқаев телевидение орқали Қозоғистон халқига йўллаган мурожаатида мамлакатда коронавирус инфекцияси билан касалланишнинг иккинчи тўлқини бошланганини маълум қилди.
Қозоғистон президенти ўз нутқида коронавирус билан боғлиқ вазият жиддий ва мураккаблашиб бораётганини таъкидлаб ўтган.
«Таассуфки, касаллик қозоғистонликларни ҳаётдан олиб кетмоқда. Расмий маълумотлар ортида юзлаб оилаларнинг кулфати турибди. Кимдир отаси, онаси, акаси, синглиси, ўғли, қизини йўқотган. Мен вафот этганларнинг яқинлари ва қариндошларига ўз таъзиямни изҳор этаман. Бу барчамизнинг умумий фожиамиз. Шу сабабли мен 13 июлни пандемия туфайли вафот этган қозоғистонликлар хотирасига мотам куни деб эълон қиламан», — дейди Тўқаев.
Қозоғистон президенти пандемия бошиданоқ дадил ва қатъий чоралар кўрилгани кўплаб қурбонларнинг олдини олганини, бироқ карантин чораларига оммавий равишда эътиборсизлик қилиниши, Соғлиқни сақлаш вазирлигининг тизимли хатолари, ҳокимларнинг сусткашлиги иккинчи тўлқинга сабаб бўлганини, шу туфайли давлат комиссияси томонидан бутун мамлакат бўйлаб икки ҳафталик карантин жорий қилиниши тўғрисида қарор қабул қилинганини таъкидлаган.
«Бу тўғри қарор. Айни пайтда вазият барқарорлашганининг илк белгилари пайдо бўлди. Лекин бўшашишга эрта. Келаётган ҳафталар пандемияга қарши курашда ҳал қилувчи бўлади», — дейди Қозоғистон президенти.
Аввалроқ Қосим-Жўмарт Тўқаев мамлакатда дори воситаларининг тақчиллиги сабаб аҳолига мурожаат йўллаган, ҳуқуқ-тартибот идораларига дори-дармон чайқовчилиги билан шуғулланаётганларни ушлаш топшириғини берган эди.
Сўнгги маълумотларга кўра, Қозоғистонда коронавирусга чалинганлар сони 53 021 кишига етган. Ҳозирга қадар 35 137 киши соғайган, 264 киши вирус қурбонига айланган.
Изоҳ (0)