Канадада дунёдаги энг кичик автомобиль 30 минг доллар эвазига сотувга қўйилди

Канададаги Bring a trailer аукционида уч ғилдиракка эга бир ўриндиқли Peel P50 модели сотувга қўйилди. 1964 йилда ишлаб чиқарилган модель учун 30 минг доллар сўралмоқда. Машина дунёдаги энг кичкина серияли автомобиль ҳисобланади, деб хабар беради «Bringatrailer.com».

Сотувга қўйилган нусха Британиянинг Peel Engineering компанияси томонидан 1962—1965 йилларда яратилган шу турдаги 50 та уч ғилдиракли автомобиллардан бири ҳисобланади. Моделнинг узунлиги 1372 миллиметрни, эни эса 991 миллиметрни ташкил этади. Бир ўриндиқли машинанинг оғирлиги 59 килограммга тенг. 2010 йилда модель дунёдаги энг кичкина серияли автомобиль сифатида Гиннеснинг рекордлар китобидан жой олган.

Аукционга қўйилган Peel P50 модели 1964 йилда Буюк Британиядаги конвейердан чиққан. Шундан сўнг у Канадага келиб қолган ва реставрация қилиниб, идеал ҳолатга келтирилган. Автомобиль кузови шиша тола ёрдамида қайта тикланган, салондаги ягона ўриндиқ оқ чарм билан қопланган.

Мазкур автомобилга 4,2 от кучига эга 49 кубли мотоцикл двигатели ўрнатилган бўлиб, у уч поғонали механик узатмалар қутиси ёрдамида бошқарилади. Peel P50’нинг максимал тезлиги соатига 60 километрга тенг.

Peel P50’нинг одометри йўқлиги сабаб 56 ёшли модель ҳозирга қадар қанча йўл босгани номаълум. Дунёдаги энг кичкина серияли автомобиль 30 минг доллар эвазига сотувга қўйилган бўлиб, аукцион яна 6 кун давом этади.

Июнь ойларининг бошларида Германияда ҳам Peel P50 сотувга қўйилиб, у 150 минг еврога баҳоланган эди.