Испания аҳолисида коронавирусга қарши иммунитет деярли ҳосил бўлмаётгани аниқланди

Испанияда текширувдан ўтказилган аҳолининг 5 фоизидагина коронавирусга антитана аниқланди, деб хабар беради BBC.

Таъкидланишича, Испаниянинг қирғоқбўйи ҳудудларида истиқомат қилувчи аҳолининг 3 фоиздан камроғида COVID-19’га қарши антитана аниқланган, бироқ касаллик авж олган ҳудудларда ушбу кўрсаткич юқори.

Тадқиқот муаллифларининг ҳисоблашича, Испанияда коронавирус кенг кўламда тарқалганига қарамай, антитаналар миқдори жуда кам ва бу коллектив иммунитетни ҳосил қилиш учун етарли эмас.

Коллектив иммунитетга вирус билан касалланган инсонлар сони унинг тарқалишини тўхтатиш учун етарли бўлганида эришилади. Инфекцияга чалинмаганларни ҳимоя қилиш учун аҳолининг 70-90 фоизида иммунитет бўлиши керак.

«Бу каби вазиятда ижтимоий масофаланиш ва янги ҳолатларнинг аниқланиши ҳамда касалларни изоляциялаш эпидемияга қарши курашда муҳим аҳамиятга эга», — дейилади ҳисоботда.

Аввалроқ олимлар иммунитет ҳосил бўлиши учун аҳолининг камида 75 фоизи коронавирусга чалиниши кераклигини маълум қилганди.