Саудия Арабистонида коронавирус билан касалланганлар сонининг ортаётгани сабаб америкалик ўнлаб дипломатлар ўз оилалари билан мамлакатни тарк этмоқда, деб хабар беради Wall Street Journal.
Нашр манбаларининг сўзларига кўра, дипломатларнинг бир қисми 4 июль куни подшоҳликдан АҚШга учиб кетган. Яқин орада бунданда кўпроқ дипломатлар мамлакатни тарк этиши кутилмоқда.
WSJ’нинг ёзишича, АҚШнинг Саудия Арабистонидаги элчихонаси ходимлари март ойидан буён масофадан туриб ишлаётганига қарамай, камида 30 нафар ходимида коронавирус тести ижобий чиққан. Уларнинг аксарияти америкалик эмас.
Июнь ойида элчихона ҳайдовчисида коронавирус аниқланган эди, кейинроқ у вафот этган. Шундан сўнг, Саудия Арабистонидаги касалхоналардан бири дипломатик идора ходимларидан бирининг оила аъзосига тезкор ёрдам кўрсатишдан бош тортган ва элчихона вазиятга аралашишга мажбур бўлган.
Газетанинг маълумотларига кўра, июнь ойида АҚШ Вакиллар палатасининг Ташқи ишлар бўйича қўмитаси номаълум шахсдан мактуб олган бўлиб, унда Саудия Арабистонида вирус билан боғлиқ вазиятдан хавотирда эканлиги ёзилган. Шундан сўнг, қўмита Давлат департаменти билан боғланган ва дипломатларнинг мамлакатни тарк этишига рухсат берилган.
Шунингдек, АҚШнинг бир қатор дипломатлари Саудия Арабистони COVID-19 билан касалланганлар сони ва унинг ҳақиқий кўламини яшириши мумкинлигидан ташвишда.
Аввалроқ Саудия Арабистонида 23 мартдан бошлаб жорий этилган комендантлик соати 21 июнь куни бекор қилингани хабар берилган эди. Аммо шунга қарамай, кўплаб чекловлар ўз кучида қолди. Ҳукумат хорижга саёҳат қилиш ва зиёратларга қўйилган тақиқларни ўз кучида қолдирган.
Жонс Ҳопкинс университети маълумотларига кўра, Саудия Арабистонида коронавирусга чалинганлар сони 205,9 мингдан, вирус қурбонлари эса 1,8 минг кишидан ошган.
Изоҳ (0)