Кўз атрофидаги ажинларни уколсиз йўқотиш учун тавсиялар

Ажинлардан қутулиш учун юзни инъекциялар билан қийнашнинг ҳожати йўқ, қуйидаги тавсияларга амал қилсангиз кифоя.

Крем

Агар ёшингиз ҳали 30 дан ошмаган, лекин юзингизда кичик ажинлар пайдо бўлган бўлса, унда пулингизни турли воситалар, хусусан, гелларга сарфламаслик, унинг ўрнига таркибида ретиноид бўлган кремлардан, профилактика сифатида эса C витаминига бой кремдан фойдаланиш тавсия қилинади. Чунки айнан ушбу витамин коллоген синтези ва ҳужайралар регенерациясига жавоб беради. Шунингдек, гиалурона кислотаси бор бўлган кремлар ҳам яхши фойда беради.

Уқалаш

Ажин тушишининг олдини олиш ёки уларнинг камайиши учун юзни уқалаш яхши натижа беради. Агар уқалаш зайтун ёки кокос ёғи билан амалга оширилса борми, кутилгандан тезроқ ўзгариш сезилади. Чунки ушбу ёғлар таркибидаги витамин E ва бошқа антиоксидантлар терининг озиқланиши ва ҳужайраларнинг қайта тикланишига сабабчи бўлади. Юзни кунига бир-икки марта бир неча дақиқа давомида уқалаш тавсия қилинади.

Кўз атрофига ниқоб

Дўкон тўла тайёр ниқоблар бўлишига қарамай, уларни уй шароитида ўз қўлингиз билан тайёрлаш маслаҳат берилади. Бу орқали сиз ҳам кимёвий воситаларсиз табиий ниқоб билан терини яхшилаган ҳамда маблағингизни тежаган бўласиз. Қуйида ниқоблар рецептини ҳавола этамиз.

Картошкали ниқоб

Картошкани бўтқа ҳолига келтиринг ва ёғли қаймоқ қўшинг. Аралашмани кўзингиз атрофига суртинг ва 15 дақиқадан кейин илиқ сув билан ювиб ташланг.

Тухум сариғидан тайёрланадиган ниқоб

Тухум сариғига лимон шарбати ҳамда бир чой қошиқ зайтун ёғи қўшинг. Ниқобни кўз атрофидаги терига суртинг ва 20 дақиқадан кейин ювиб ташланг.

Қулупнайли ниқоб

Қулупнайни бўлакларга бўлиб, бўтқа ҳолига келтиринг ва бир чой қошиқ асал билан аралаштиринг. Аралашмани докага солиб, кўзингиз атрофига қўйинг, 15 дақиқадан кейин илиқ сувда ювиб ташланг.