Жаҳон соғлиқни сақлаш ташкилоти коронавирус инфекциясига қарши гидроксихлорохин, шунингдек, лопинавир ва ритонавир дори воситалари комбинациясини синовдан ўтказишни тўхтатди. Бу ҳақда ташкилот сайтида хабар берилди.
Бу борадаги тегишли тавсиялар COVID-19 билан касалланган беморларни даволаш воситаларини ишлаб чиқиш билан шуғулланувчи халқаро бошқарув қўмитаси томонидан берилган.
Тадқиқотлар давомида мутахассислар дори воситаларининг SARS-CoV-2 вируси оқибатида юзага келаётган ўлим ҳолатларига қандай таъсир кўрсатишини ўрганган. Дастлабки натижаларда гидроксихлорохин ва лопинавир/ритонавир COVID-19 билан касалланган беморларнинг ўлимини жуда оз миқдорда камайтиришга ёрдам бераётгани ёки умуман таъсир кўрсатмаётгани аниқланган.
Гидроксихлорохин, шунингдек, лопинавир ва ритонавир комбинацияси Solidarity халқаро клиник тадқиқотлар доираида синовдан ўтказиладиган дори воситалари рўйхатига кирилган эди.
Май ойининг охирларида ЖССТ гидроксихлорохиннинг хавфсизлигидан хавотирланиб, унинг синовларини тўхтатган эди. ЖССТ раҳбари Тедрос Гебрейесус ушбу дори воситасини истеъмол қилганларда ўлим даражаси ортганини маълум қилган. Июнь ойида ташкилот эксперти Анна Мария Рестрепо синовлар тўлиқ тўхтатилишини билдирган.
Гидроксихлорохин — безгакка қарши дори воситаси. Аввалроқ АҚШ президенти Дональд Трамп COVID-19’га қарши профилактика сифатида ушбу препаратни ичаётганини маълум қилганди. Шундан сўнг мамлакатда безгакка қарши гидроксихлорохин ва хлорин препаратларига талаб 46 баравар ошган. Президент препаратларнинг коронавирусни даволашда таъсирини бир неча бор ижобий баҳолаган. Мутахассислар эса COVID-19’ни даволашда расман тасдиқланмаган ушбу препаратлар ҳақида бундай хулосага келишга ҳали эрта эканлигини айтиб, унинг кўплаб салбий таъсирлари борлигидан огоҳлантирган.
Сўнгги маълумотларга кўра, вирусга қарши дори воситаларини тестдан ўтказиш жараёнида фақатгина ремдесивир COVID-19’га қарши умид уйғотувчи натжаларни кўрсатгани тўғрисида хабар берилганди.
Изоҳ (0)