Туркияда нонушта — каҳвалти муҳим маросимга ўхшайди. Швед столини эсга соладиган дастурхонда тури маҳсулотлар, сабзавот ва мевалар алоҳида-алоҳида идишларга солиниб, дид билан безатилади.
Дастурхонда, асосан, нон, зайтун, бринза ёки пишлоқ, кўкатлар ўрин олган бўлади. Турк нонуштасини омлет — менемен ва тетиклаштирадиган аччиқ чой ёки турк қаҳвасисиз тасаввур қилиб бўлмайди.
Бундан ташқари турклар, нонуштага кунжутли нон — смит ейишни хуш кўради. Яна бир ўзига хослик шундаки, турли-туман маҳсулотлар кўп бўлмаган миқдорда столга қўйилади. Асал, мураббо, шоколад пастаси сингари ширинликлар махсус кичик идишларда нонушта дастурхонини безайди.
Бундан ташқари пишлоқли тост, қовурилган картошка ёки сосискалар ҳам хоҳишга кўра нонуштадан ўрин олиши мумкин.
Шунингдек, туркларда дам олиш кунлари уйдан ташқарида дўстлар ва яқинлар билан кечроқ нонушта қилиш анъанаси бор. Баъзида бундай дийдорлашиш табиат қўйнида ўтказилади.
Туркияда яшил парклар, сокин боғ ва кўчалар кўп. Боғлардаги қалин, баланд дарахтлар ва фавворалар жазирама кунларда ҳам бемалол пикник қилиш имкониятини беради. Пикник дастурхонидан, асосан, мавсумий мевалар, ширинликлар, шарбат ва бутербродлар ўрин олиши мумкин.
Турклар нонуштани тез-тез, йўл-йўлакай қилишни ёқтирмайди аксинча, дастурхон атрофида тўпланиб, таомдан шошмай лаззатланиш ва унинг баҳонасида дилдан суҳбатлашишни хуш кўради.
Изоҳ (0)