«Ўзбекистон Республикасида ёшларга оид давлат сиёсатини тубдан ислоҳ қилиш ва янги босқичга олиб чиқиш чора-тадбирлари тўғрисида»ги Президент фармони қабул қилинди. Бу ҳақда Адлия вазирлигининг Telegram’даги «Ҳуқуқий ахборот» канали хабар қилган.
Фармонга мувофиқ, Ўзбекистон Республикаси Ёшлар ишлари агентлиги ҳамда унинг Қорақалпоғистон Республикаси, вилоятлар, Тошкент шаҳар бошқармалари ва туман (шаҳар) бўлимлари ташкил этилди.
Ҳужжатда агентликнинг асосий вазифа ва фаолият йўналишлари белгилаб берилган.
Агентлик, жумладан, ёшлар билан боғлиқ соҳа ва йўналишларда ягона давлат сиёсати, стратегик йўналишлар ва давлат дастурларини ишлаб чиқади ҳамда амалга оширади.
Шунингдек, агентлик ёшлар сиёсати соҳасидаги қонун ҳужжатларига риоя этилиши устидан давлат назоратини таъминлайди.
Фармон билан Ўзбекистонда ёшларга оид давлат сиёсатини янада ривожлантиришга доир қўшимча чора-тадбирлар дастури тасдиқланди.
Дастурда, жумладан, Ўзбекистон ёшлари порталини ташкил этиш ва унда ёшлар сиёсатини баҳолаш миллий индекслари ҳамда ёшларга оид қонун ҳужжатлари базасини шакллантириш белгиланган.
Дастурда назарда тутилган тадбирлар агентлик томонидан тўғридан-тўғри ёки нодавлат нотижорат ташкилотларига ижтимоий буюртма шаклида ажратиладиган давлат грантлари ва субсидиялар тақсимлаш орқали молиялаштирилади.
Мавзуга доир: Шавкат Мирзиёев Ёшлар иттифоқи негизида Ёшлар ишлари агентлигини ташкил этишни таклиф қилди
Эслатиб ўтамиз, 2017 йил 30 июнда «Камолот» ЁИҲнинг IV қурултойида иштирок этган Ўзбекистон Президенти Шавкат Мирзиёев мамлакатда Ўзбекистон Ёшлар иттифоқини ташкил этиш таклифини билдирган ва шу кунни Ўзбекистонда Ёшлар куни сифатида нишонлаш ташаббусини илгари сурганди.
Изоҳ (0)