«Ягона умумреспублика процессинг маркази» МЧЖ (Uzcard бренди остида банк пластик карточкалари эмитация қилади) банклардаги онлайн омонатлар учун яна тўлов олишни бошлагани жамоатчилик орасида норозиликларни келтириб чиқарганди. Кейинчалик монополияга қарши курашиш қўмитаси бундай тўлов олишнинг қанчалик даражада тўғри ва асосли эканини ўргана бошлагани хабар қилинганди. Ўрганиш жараёни бошланганидан деярли икки ой вақт ўтгач, қўмита масала юзасидан расмий ахборот берди.
Қўмита матбуот хизмати хабарига кўра, «Ягона умумреспублика процессинг маркази» МЧЖдан сўралган тегишли маълумотлар тўлиқ берилмаган ва шу сабабли ўрганиш муддати чўзилиб кетган.
Монополияга қарши курашиш қўмитаси «Ягона умумреспублика процессинг маркази» МЧЖ сўралган маълумотларни тақдим этмаса, Ўзбекистон Республикасининг «Рақобат тўғрисида»ги қонунининг 27-моддасига биноан мазкур хўжалик юритувчи субъектнинг маъмурияти маъмурий жавобгарликка тортилиши мумкинлигини маълум қилган.
«Рақобат тўғрисида»ги қонуннинг 27-моддасида монополияга қарши органга ахборотни тақдим этмаганлик ёки ўз вақтида тақдим этмаганлик, нотўғри ёки ёлғон маълумотлар тақдим этганлик, танлов (тендер) ёки биржа савдоларига доир монополияга қарши талабларни бузганлик учун юридик шахсларнинг мансабдорларига нисбатан маъмурий жавобгарлик чоралари кўрилиши белгилаб қўйилган.
Маъмурий жавобгарлик тўғрисидаги кодекснинг 178-моддаси биринчи қисмида мазкур қоидабузарлик учун жисмоний шахсларга базавий ҳисоблаш миқдорининг бир бараваридан уч бараваригача, мансабдор шахсларга эса уч бараваридан беш бараваригача жарима тайинланиши белгиланган.
Изоҳ (0)