Шопоголик бу харид қилмаса туролмайдиган, пул сарфламаса ўзини ёмон ҳис қиладиган инсонлар. Немис психиатр-олимлари томонидан шопоголизмнинг касаллик экани аниқланган. Дўкон бўйлаб аниқ нима олишини билмасдан, айланиб юравериш шопоголикларнинг ҳаммасида кузатиладиган симптом ҳисобланади. Бундай одамларда харид қилиш, депрессия, ёлғизлик ва бошқа шахсий муаммоларга нисбатан таскиндек туюлади.
Шопоголизм бу қарамлик. Ўзингиз ва бошқаларга харид қилишни бас қила олишингизни таъкидлаган вақтингиздаёқ сиз қарам эканлигингизни ўз оғзингиз билан тан олган бўласиз.
Ҳақиқий шопоголик, арзон ва қиммат нарсаларнинг фарқини жуда яхши билиш билан бирга, қимматга олган либоси ёки аксессуар нархини атрофдагиларга арзон қилиб айтади, ёки яширади. Уларнинг мантиқлари, яқинлари асабини бузишдан кўра, чекларни яшириш кераклигига асосланган бўлади.
Яна бир хусусият, ёқтирган нарсани олмаса ўзини ёмон ҳис қилиш, фикр-хаёлидан кетмаслик ҳисобланади. Ўша нарсага эришгандан кейин гўё сиздан бахтли одам йўқдек туйилади, лекин бу бир ёки икки кунда ўтиб кетиб кейин яна янги ўлжалар ва уни қўлга киритмаса ёмон бўлиб қоладигандек туйғулар қайталанаверади.
Агар сиз харид учун молиявий аҳволингиз ва режадагидан ҳам кўп сарф қилаётган бўлсангиз, демак сиз ҳам ушбу касалликка чалиниш арафасидасиз ва тезроқ чора кўрмасангиз бўлмайди.
Шопоголизмга қарши қандай курашиш мумкин?
Маблағингизни таълим ва саломатлигингиз учун зарур бўлган нарсаларга йўналтиринг. Хариддан аввал, шу нарса менга ростан ҳам керакми, шусиз умуман иложи йўқми, деган савол бериб кўринг.
Бюджетингизни назорат қилишни ўрганинг.
Даромад ёки маошингизни қисмларга бўлиб, ўндан биринигина харидга ажратинг.
Ўзингизни жазоланг.
Ҳар қандай кераксиз харид қилиб қўйганингиздан кейин энг ёқтирмаган уй ишингизни бажаринг.
Стоп дейишни билинг.
Кассага етиб боргунча ўзингизни тўхтатинг, ўнгача сананг кейин бўлса дўконни тарк этинг. Интернетдан буюртма қилмоқчи бўлсангиз, ёқтирган нарсаларингизни саватчага ташлаб қўйинг, лекин харид қилишга шошилманг. Бугун сиз энг кўп истаган нарса, эртага унчалик муҳим бўлмай қолиши мумкин. Агар шу тарзда давом этсангиз харид қилишга бўлган иштиёқ секин-аста сўниб боради.
Изоҳ (0)