Футбол бўйича Ўзбекистон Суперлигаси 5-туридан ўрин олган ОКМК ва «Сурхон» жамоалари ўртасидаги баҳсдан кейин ҳар иккала жамоа бош мураббийлари ўйин ҳақидаги фикрлари билан ўртоқлашди.
Дастлаб меҳмонлар бош мураббийи Баҳром Ҳайдаров ўйин ҳақида қуйидаги фикрларни билдириб ўтди.
«Албатта, бундай мағлубиятга учраш ҳар бир жамоа учун жуда аламли. Лекин ушбу ўйинда хурсанд қилгани, ҳар бир футболчимиз ўйинга режалаштирилган тактикани тўлиқ бажарди. Омад келмади ва футболчиларнинг техник маҳорати озроқ панд берди. Умуман олганда, жамоа вазифани тўлиқ бажарди. Ўйинни таҳлил қилиб чиқсак, ким қаерда хато қилганини кўриб чиқамиз.
Ҳар хил ўйин бўлиб туради. Биз дуранг учун келмагандик, чунки турнир жадвалдаги ҳолатимизга кўра ҳар бир ўйинда уч очко учун ўйнашимиз керак. Дарвозабонимиз жамоадошларини ўз позициясини эгаллаб олишлари учун шундай қилгандир.
Албатта, жамоа ғалаба қозонгандан кейин ҳақли равишда ғалаба қозонган бўлади, биз ноҳақ мағлубиятга учрадик демоқчи эмасман. Ҳар бир ўйин ва ҳар бир рақибга қараб ўйин стратегиясини ишлаб чиқишимизга тўғри келади. Масалан, кечаги ўйин ҳам кўрсатди, очиқ ўйин нималарга олиб келишини. ОКМК функционал томондан биздан кучлироқ, агар очиқ ўйин кўрсатганимизда ҳисоб йириклашиб кетиши мумкин эди. Биз ўз имкониятимиз кутдик, бир-икки вазият бўлди, ундан фойдаланганимизда, балки натижа бошқачароқ бўларди.
Ҳар бир футболчининг ўз ўрни бор, айниқса, Шавкат Саломовдек маҳоратли футболчининг. Лекин биз ҳар қандай ҳолатга тайёр туришимиз лозим. Дисквалификация муддати тугади, ўйлайманки, у кейинги ўйинларда бизга ёрдам бера олади», — деб Ҳайдаровнинг сўзларини келтиради «Championat.asia».
ОКМК устози Миржалол Қосимов эса ўйиндан сўнг «Сурхон»нинг ҳимоя чизиғи ишончли ўйин кўрсатгани ҳақида гапирди.
«Ўйин осон бўлмади. «Сурхон» малакали футболчиларга эга яхши шаклланган жамоа. Ўтган турда улар «Машъал»ни ютолмагани туфайли ҳам бугун янада кучли иштиёқ билан ўйнади. Улар бугун ҳимояга эътибор қаратган ҳолда, қарши ҳужум тактикасига таяниб ўйнади. Қолаверса, «Сурхон»да қарши ҳужумда яхши ҳаракатланадиган ҳужумчи – Касян бор.
Рақиб асосан ҳимояда ўйнагани боиси биринчи бўлимда уларнинг мудофаасидан ўтишга қийналдик. Иккинчи бўлимда ўзимизда куч топиб, шиддаткор ўйин таклиф этдик. Шунингдек, ўйинга тезлик, динамика қўшилди. Натижада вазиятлар пайдо бўлди.
Вазиятлардан самарали фойдаланишда камчиликлар бор. Чунки ўйин ритмини ҳис этиш учун футболчиларга вақт керак. Карантин туфайли уч ой дам олинди. Бу ҳазил эмас. Машғулот бошқа, майдонда расмий ўйин ўтказиш бошқа. Қолаверса, икки футболчимизда (Шораҳмедов ва Зонич) жароҳат борлиги туфайли улар бугун ўйинда иштирок этмади. Таркибда ўзгаришлар бўлди. Энди ротация қилиб турамиз», – дейди Қосимов.
Мазкур ғалабадан кейин олмалиқликлар очколари сонини 11 тага етказиб олиб иккинчи ўринга кўтарилиб олди. «Сурхон»нинг ҳисобида эса 5 та ўйинда 4 очко бор. Жамоа мусобақа жадвалининг 11-поғонасидан жой олган.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)