Европа иттифоқи Беларусь ҳукуматидан президентлик сайловларида иштирок этадиган номзод Виктор Бабарико ва унинг ўғли Эдуардни ҳибсдан озод қилишни сўради. Бу ҳақда Европа ташқи алоқалар хизматининг 19 июнда берган баёнотида маълум қилинган.
«Беларусь президентлигига номзод Виктор Бабарико ва унинг ўғли Эдуард жиноий ишга алоқадорликда айбланиб ҳибсга олинган. Евроиттифоқ Беларусь ҳукуматидан улардан ҳали исботини топмаган айбловларни олиб ташлаши ва қонун устуворлиги, шаффоф тергов ҳамда адвокат ёллаш имконини тақдим қилиши зарур. Ҳар қандай тергов холис ва сиёсий босимсиз ўтказилиши лозим», – дейилган баёнотда.
Шунингдек, Евроиттифоқ Беларусда 9 августда ўтадиган президентлик сайловлари ҳам рақобат муҳитида, эркин бўлишини таъминлаши кераклигини қайд этган.
«Ҳеч бир номзод сиёсий жиҳатдан чеклов чоралари туфайли рўйхатга олиш жараёнидан четда қолиб кетмаслиги лозим», – дея қайд этилган баёнотда.
Евроиттифоқдагилар Беларусь ҳукумати халқаро мажбуриятларни бажарган ҳолда инсон ҳуқуқлари ва сўз эркинлиги меъёрларига бўйсуниши кераклигини таъкидлаган.
«Улар потенциал номзодларга нисбатан ҳар қандай чекловлардан тийилиши, тинчлик йўли билан ташкиллаштирилган намойишларга тўсқинлик қилмаслиги ва қамоққа олинган жамоатчилик фаолларини озод қилиши лозим. Тинчлик йўли билан норозилик намойиши ўтказганларга нисбатан зўравонлик ҳолатлари хавотир уйғотади», – деган баёнот муаллифлари.
Эслатиб ўтамиз, Виктор Бабарико 18 июнь тонгида сайлов комиссиясига имзолар тўпланган қоғозларни ташлаб келиш учун чиқиб кетган ва алоқага чиқмаган. Кейинроқ у ва унинг ўғли ноқонуний фаолиятда айбланиб қамоққа олингани маълум бўлди.
Шунингдек, Бабарико ҳибсга олинган куни уларни озод қилишни сўраб Минскда амалдаги президент Александр Лукашенкога қарши норозилик намойиши ўтказилган.
Яна бир мухолифатчи — Сергей Тихановский 29 май куни милиция ходимларига нисбатан зўравонлик қилганликда айбланиб қўлга олинган. Президентлик пойгасида расман блогернинг рафиқаси иштирок этмоқда. Блогерга нисбатан жамоат тартибини қўпол равишда бузувчи ҳаракатлар ташкил қилиш ва тайёрлаш айби қўйилган.
Изоҳ (0)