Ford компанияси автомобилларни автоном бошқаришга мўлжалланган Active Drive Assist номли тизимини тақдим этди. У 2021 йилда Mustang Mach-E электрокроссоверларига ўрнатилади. Янгилик ҳайдовчига бирор-бир ишни қилаётганида маълум муддат рулни ушламасдан ҳам ҳаракатланиш имконини беради, деб хабар қилади Motor.
Active Drive Assist тизими Америка компанияси ҳайдовчиларнинг хавфсизлигини таъминлаш мақсадида ишлаб чиқаётган Co-Pilot 360 технологик лойиҳасининг бир қисми ҳисобланади. Янги технологияни биринчи бўлиб Mustang Mach-E электрокроссовери эгалари синаб кўришлари мумкин бўлади. Автопилотга эга бўлиш учун мижозлар Active 2,0 пакетига эга Mustang’ни буюртма қилишлари, шундан сўнг тизимнинг ишлаши учун алоҳида дастурий таъминот харид қилишлари керак.
Автопилот технологиясига эга автомобиль автоном ҳолатда ташқи махсус датчик ва камералар ёрдамида белгиланган маршрут бўйича ҳаракатланади. Айни вақтда Ford ўзининг тизими базасига 5 та штатдаги 160 минг километрдан ортиқ йўлларни киргизиб чиққан. Ҳозирда автопилот фақатгина йирик автомагистралларга мўлжалланган.
Шунингдек, янги технология ҳайдовчи йўлдан чалғиганини пайқай олади. Active Drive Assist’нинг элементларидан бири ҳайдовчига йўналтирилган инфрақизил камера бўлиб, у ҳайдовчининг қарашлари ва бошининг ҳолатини сезади. Америка компанияси вакилларининг таъкидлашича, мазкур тизим ҳайдовчи қорайтирилган кўзойнакда ёки ҳимоя ниқобида бўлса ҳам ишлайверади.
Изоҳ (0)