Тимо Вернер Бундеслигада 8 йилдан бери ҳеч бир германиялик футболчи қайд этолмаган натижага эришди

«Лейпциг» ҳужумчиси Тимо Вернер Германия чемпионатидан ўрин олган «Фортуна» қарши ўйинда (2:2) ўз номига гол ёздириб қўйди.

Шу тариқа футболчи саккиз йил ичида Бундеслиганинг бир мавсумида 26 та гол урган биринчи германиялик футболчига айланди. Сўнгги марта бу натижани 2011/12 йилги мавсумда «Бавария» собиқ ҳужумчиси Марио Гомес қайд этганди.

Қайд этиш жоиз, аввалроқ 24 ёшли футболчи Бундеслига 1998/99 йилги мавсумидан буён илк бор бир мавсумда битта жамоа дарвозасига икки ўйинда ҳам учтадан гол урган биринчи футболчи бўлганди. У жорий мавсум «Майнц» дарвозасига иккита ўйинда 6 та гол урди.

Тимо Вернер Германия чемпионатининг жорий мавсумида 32 та ўйин майдонга тушиб, 26 та гол урган ва 8 та голга ассистентлик қилган. Эслатиб ўтамиз, аввалроқ 24 ёшли футболчининг «Челси» билан келишувга эришгани тўғрисида хабар берилганди.