Американинг 23andMe компанияси томонидан ўтказилган тадқиқотда биринчи қон гуруҳи эгаларининг коронавирусга чалиниш эҳтимоли камроқ эканлиги аниқланди, деб хабар бермоқда «РБК».
Тадқиқотда 750 минг бемор иштирок этган бўлиб, уларнинг 10 минг нафари коронавирусга чалинган. Мутахассислар тадқиқот давомида мижозларнинг жинси, вазни ва ёшини ҳисобга олган ҳолда биринчи қон гуруҳи бўлган одамлар орасида коронавирус билан касалланиш даражаси 9-18 фоизга пастлигини аниқлаган.
Қайд этилишича, бу резус омили мусбат ва манфий бўлганлар учун бирдай характерлидир. Аввалги тадқиқотларда фақат мусбат омиллар учун хослигини кўрсатган.
Аввалроқ Россия федерал тиббий-биологик агентлиги раҳбари Вероника Скворцова иккинчи қон гуруҳига мансуб кишилар бошқаларга нисбатан кўпроқ коронавирус билан касалланаётганини маълум қилганди. Иккинчи ўринда I ва III қон гуруҳлари турибди. IV қон гуруҳи эгалари орасида касалланиш ҳолатлари бошқаларга қараганда анча кам.
Россия федерал тиббий-биологик агентлиги раҳбарининг фикрича, ушбу ҳолат қон гуруҳларининг тарқалиш сонига боғлиқдир. Иккинчи гуруҳ бутун дунёда энг кўп тарқалган гуруҳлардан бири.
Аввал Россияда хизмат кўрсатган шифокор Владимир Круглий ҳам коронавирус билан касалланганлар орасида қони иккинчи гуруҳга мансуб беморлар кўплигини маълум қилганди. У Хитойдаги касалланиш бўйича маълумотларга таяниб, у ерда 30 фоиз беморларнинг қони II гуруҳга мансублигини қайд этган.
Март ойида Хитой олимлари касалланганларнинг қон гуруҳлари бўйича таҳлилини эълон қилган ва ушбу маълумотлар Ухань ҳамда Шинжондаги беморлар мисолида тақдим этилган. Тадқиқот натижалари бўйича COVID-19’га чалиниш ҳолатлари, асосан, иккинчи гуруҳ вакилларида учраган, биринчи гуруҳ вакилларида эса касалланиш ҳолатлари бошқаларга нисбатан камроқ кузатилган.
Изоҳ (0)