Sulton Тех Group ишини кўрган суд Қарши туман адлия бўлимига фермерлар ва пахта тозалаш заводи акциядорларининг ҳуқуқий саводхонлигини оширишни тавсия қилди

Қашқадарё вилояти Қарши туманидаги Sulton Тех Group иши бўйича бўлиб ўтган суд мажлиси якунида Қарши туман адлия бўлимига фермерлар ва пахта тозалаш заводи акциядорларининг ҳуқуқий саводхонлигини ошириш тавсия қилинди.

Мазкур суд мажлисида қатнашган «Дарё» мухбирининг маълум қилишича, бу ҳақда суд ажрими чиққан бўлиб, туман адлия бўлими бир ой давомида фермерлар ва туман пахта тозалаш заводи акциядорлари учун ўқув-семинар ўтказиб, бу ҳақда судни хабардор қилиши лозимлиги белгиланди.

Қарши туман Маъмурий суди туман адлия бўлимига пахта тозалаш заводи акциядорларига Ўзбекистон Республикасининг 2014–йил 6 майдаги «Акциядорлик жамиятлари ва акциядорларнинг ҳуқуқларини ҳимоя қилиш тўғрисида»ги қонуни мазмунини ва акциядорларнинг кузатув кенгаши ваколати ҳамда жамият қошида тобе жамият ташкил этиш тартиби мавзусида ўқув семинар ташкил этишни тавсия қилди.

Тумандаги фермер ва деҳқон хўжалиги раҳбарларига эса Фуқаролик кодекси талабларидан келиб чиқиб, хўжалик юритувчи субъектлар ўртасидаги контарктация шартномаларини тузиш ва бу шартномаларни бекор қилиш ёки ўзгартириш тартиби ҳақида маърузалар қилиш таклифи берилди.

Эслатиб ўтамиз, Қарши туманидаги мавжуд фермер хўжалиги раҳбарлари 2020 йил бошида Sulton Тех Group кластери билан шартнома имзолаган ва мазкур шартнома ўз кучини йўқотмаган бўлишига қарамасдан янги ташкил этилиши кўзда тутилган, аммо ҳали шаклланмаган кооперация деб аталган МЧЖ билан шартнома тузишга мажбурланганди. Бу ҳақда «Дарё» мухбири билан суҳбатлашган фермерларнинг айтишича, туман ҳокимлиги масъуллари, хусусан, ҳоким ўринбосари Акром Арипов фермерларга янги ташкил этилган кооперация билан шартнома тузмаса, ери олиб қўйилиши мумкинлигини айтиб қўрқитган.

Мазкур масала юзасидан журналистик суриштирув олиб борган «Дарё» мухбири тумандаги фермер хўжалиги раҳбарлари бўш шартномага имзо қўйишга мажбурлангани ҳақида хабар берганди.