Ўзбекистон коронавирусга қарши кураш учун Қозоғистонга инсонпарварлик ёрдами юборди

Ўзбекистон Қозоғистоннинг Туркистон шаҳрига 7 июнь куни учта юк машинасида инсонпарварлик ёрдами юборди, деб хабар бермоқда «Kazinform».

Унда 150 мингта тиббий ниқоб, 2 500 та ҳимоя костюми, 150 мингта тиббий қўлқоп, 1 000 та термометр ва беморлар учун 440 та каравот бўлган.

Қайд этилишича, ушбу ёрдам Туркистон вилояти тиббиёт муассасаларига тарқатилади.

Маълумот учун, Қозоғистонда коронавирусга чалинганлар сони 12 859 кишига етган. Ҳозирга қадар 7 376 киши соғайган, 56 киши вирус қурбонига айланган. Шунингдек, 1 357 киши белгисиз ташувчи сифатида қайд этилган.

Аввалроқ Ўзбекистон инсонпарварлик ёрдами сифатида Тожикистонга 1 000 тоннадан ортиқ ун юборгани, Ўзбекистон пандемия сабабли Афғонистонга кўрсатиладиган ёрдамни кенгайтириш кераклигини маълум қилгани ҳақида хабар берилган эди.