Венсан Компани ўзи тўп сураётган клубга 3 млн евро хайрия қилди

«Манчестер Сити» собиқ ҳимоячиси, ҳозирда «Андерлехт»да ўйновчи мураббий сифатида фаолият юритаётган Венсан Компани бельгияликлар клубига 3 миллион евро миқдорида моддий ёрдам тақдим этди, дея хабар қилмоқда DH les Sports+.

«Андерлехт» бош директори Ван Этвелт ҳимоячи қарорини шарҳлаб ўтди.

«Венсаннинг сармояси рамзий маънога эга. Уни яхши таниганлар Венсан бунинг эвазига ҳеч нарса талаб қилмаслигини яхши билади», — дейди Этвелт.

Аввалроқ Компани «Манчестер Сити»да Хосеп Гвардиоланинг ассистенти бўлишдан бош тортганди.

Компани «Андерлехт» тарбияланувчиси ҳисобланади. У 17 ёшида Бельгия клуби сафида дебют қилган. 2006 йилда 10,5 миллион евро эвазига «Ҳамбург»га йўл олганди. Орадан икки йил ўтиб футболчи «Манчестер Сити»га ўтди ва у ерда 11 йил тўп сурди.

Жорий мавсум 34 ёшли футболчи «Андерлехт»нинг 18 та ўйинида иштирок этиб, биттадан гол ва голли узатмани ўз ҳисобига ёздириб қўйди. Шунингдек, унинг иштирокидаги 7 учрашувда клуб ўз дарвозаси даҳлсизлигини сақлаб қолган.

Мавзуга доир: Англия Премьер Лигаси тарихидаги энг яхши марказий ҳимоячилар аниқланди