Фавқулодда вазиятлар вазирлиги томонидан зарарли чигирткаларнинг кириб келишини олдини олиш ва бартараф этиш бўйича қатор тадбирлар ташкил этилмоқда. Бу ҳақда вазирлик хабарида маълум қилинди.
Қайд этилишича, бугунги кунда республика бўйича зарарли чигирткаларни 327,4 минг гектар майдонда тарқалганлиги аниқланиб, 309,6 минг гектар майдонда кимёвий ишловлар ўтказилди.
2020 йилда зарарли чигирткаларни республика ҳудудига кириб келишининг олдини олиш учун жойларда 597,9 минг гектарда кимёвий ишлов ўтказилиши режалаштирилган.
Шунингдек, маҳаллий бюджетдан ажратилган маблағлар ҳисобидан бугунги кунгача зарарли чигирткаларга қарши 397 минг гектар майдонда ишловларни ўтказишни таъминлайдиган кимёвий воситалар заҳираси яратилган.
Ушбу тадбирларга 500 дан ортиқ махсус техникалар ва 700 нафардан ортиқ ишчилар жалб қилинган.
Хабарда айтилишича, бу ишлар қўшни давлатлар, жумладан, Қозоғистон, Туркманистон ҳамда Қирғизистон республикалари билан ҳамкорликда олиб борилмоқда.
Аввалроқ Марказий Осиё давлатларига чигирткалар ёпирилиши кутилаётгани, Туркманистон президенти зараркунандаларга қарши курашиш бўйича топшириқ бергани хабар берилган эди.
«Ўзагроҳимоя» компанияси етакчи мутахассиси Ўткир Мирзаев эса Ўзбекистон ҳудудига чигирткаларнинг катта миқдордаги зарарли тўдаси кириб келгани ҳақида маълумот келиб тушмагани, ҳозирги вақтда бундай хавф йўқлигини маълум қилганди. Шунингдек, чегара ҳудудларда махсус техникалар шай тургани, чигирткаларнинг ҳар қандай хавфли тўдасини йўқ қилиш учун техник имкониятлари ҳам, кимёвий дори воситалар ҳам етарли эканлигини таъкидлаганди.
Изоҳ (0)