Кўпчилик коронавирус пандемиясига қадар Хитойнинг Ухань шаҳри ҳақида ҳеч нарса билмасди. 2020 йилдан кейин ушбу мегаполисни дунёдаги ҳар бир инсон одатий ҳаёт тарзини ўзгартириб юборган, одамларни уйда ўтиришга мажбур қилган, дунё иқтисодиётини тўхтатиб қўйган касаллик манбаси сифатида эслаб қолади.
Фотограф Фергус Койл ўзининг «Ухань бўйлаб сайр» лойиҳаси доирасида ушбу шаҳарга қўрқув ва хавотирсиз, одамлар севиб қолиб, турмуш қурадиган, сайр қиладиган, бир сўз билан айтганда, ҳамма қатори ҳаёт кечирадиган дунёнинг бир бўлагига қарагандек назар солишга ундайди.
«Уханнинг географияси мени илҳомлантирди. Шаҳар Янцзи ва Ханьшуй дарёлари кесишадиган жойда жойлашган. У ерда яшаган пайтим мунтазам равишда Учань туманида паромга ўтириб, Янцзининг шимолий қирғоғидаги Hankou Bund боғига етиб олардим. Сувда сузувчилар сузиб юрарди, улар яқинида йирик юк кемалари кўзга ташланарди», — дея хотирлайди фотограф.
Hankou Bund парки Янцзи дарёсига параллел равишда тўрт километр майдонда жойлашган. Маҳаллий аҳоли бу ерда спорт билан шуғулланади, шахмат ўйнайди, рақсга тушади ҳамда Хитойдаги энг баланд бино — Ухань Гринлэнд маркази фонида фотосессия уюштиради. Осмонўпар ушбу бино баландлиги 475,6 метр бўлиб, у баландлиги бўйича дунёда тўртинчи ўринда туради.
«Маҳаллий аҳоли қуш шаклидаги варракларни маҳорат билан учиришини кузатиш — энг ёқимли ҳолатлардан бири. Улар қушни сувга шундай яқин олиб борадики, узоқдан қараганда қуш ўлжа учун сувга шўнғиётгандек туюлади», — дейди фотограф.
Ухань одатда ўта шовқинли шаҳар. Унинг ҳар бир бурчагида қандайдир фаолликни кузатиш мумкин. Шаҳар аҳолиси жуда хушмуомала, бу ерда гастрономик маданият ривожланган. Одамлар, асосан, кўчада овқатланади.
Уханга бир йилда миллиондан ортиқ сайёҳлар ташриф буюради. Шунингдек, у мамлакатнинг энг йирик талабалар шаҳарларидан бири ҳисобланади. Уханда 20 дан ортиқ йирик университетлар бўлиб, уларда кўплаб чет эллик талабалар таҳсил олади.
«Касаллик туфайли узоқ муддат жўшқин ҳаёт тўхтаб қолган Уханга четдан назар солиш қайғули бўлди», — дейди фотограф.
Изоҳ (0)