«Коронавирус пандемиясининг салбий таъсирини камайтириш учун туризм соҳасини қўллаб-қувватлашга доир кечиктириб бўлмайдиган чора-тадбирлар тўғрисида»ги Президент фармони қабул қилинди. Бу ҳақда Telegram’даги «Ҳуқуқий ахборот» канали хабар берди.
Фармонга кўра, Туризмни ривожлантириш давлат қўмитаси тасарруфидаги техникум ва коллежларга 2020 йилда ўқишга қабул қилинган барча тингловчиларни ўқитиш, истисно тариқасида, давлат гранти асосида амалга оширилади.
Шунингдек, 2020 йил 1 октябрдан бошлаб жойлаштириш воситаларини қуриш учун тижорат банклари томонидан аввал берилган кредитлар бўйича асосий қарз тўлови 18 ойдан 24 ойгача узайтирилади.
Таъкидланишича, 2022 йил 1 январга қадар юридик шахслар белгиланган рўйхатлар бўйича Ўзбекистонга олиб кириладиган дезинфекция учун жиҳозлар, техникалар, уларнинг эҳтиёт қисмлари, бино ва иншоотларни қуриш, реконструкция қилиш ва жиҳозлаш учун алоқасиз бошқариладиган (сенсорли) жиҳозлар, шунингдек, ҳидсиз дезинфекцияловчи воситалар учун божхона тўловларини тўлашдан (божхона расмийлаштируви учун йиғимлар ва ҚҚС ташқари) озод этилади.
Аввалроқ Ўзбекистонда 1 июндан ички туризм ўз фаолиятини қайта бошлаши, Шавкат Мирзиёев туризм соҳасига имтиёз ва преференциялар беришни таклифни қилгани ҳақида хабар берилганди.
Эслатиб ўтамиз, 2020 йилнинг январь ойи охирларида Президент Шавкат Мирзиёев раислигида ўтказилган йиғилишда туризм соҳасида кадрлар масаласига эътибор қаратилиб, 20 та олий таълим муассасасида ҳамда Туризмни ривожлантириш давлат қўмитасига бириктирилган 3 та техникум ва 9 та коллежда ишчи касблар тайёрлаш тизимини жорий этиш бўйича кўп муаммолар ўз ечимини топмагани таъкидлаб ўтилганди.
Изоҳ (0)