Ўзбекистонда ички туризмни тиклаш ва ривожлантириш мақсадида Айдар-Арнасой кўллар тизимида ва Тўдакўл тизимида дам олиш ҳудудлари ташкил этилиши кўзда тутилган. Ушбу лойиҳалар 27 май куни Президент Шавкат Мирзиёевга тақдим этилган, бу ҳақда «Ўзбекистон 24»нинг репортажидан маълум бўлди.
Айдар-Арнасой кўллар тизимида Ором қирғоғи (Leisure Coast) сув соҳилбўйи дам олиш маскани ташкил этиш, Айдар-Арнасой кўллар тизими бўйлаб йўловчи ташувчи мунтазам автобуси қатновини йўлга қўйиш кўзда тутилган. Тўдакўлда ҳам соҳилбўйи дам олиш маскани ташкил этилади, тадбиркорлар жалб этилиб, инфратузилма яхшиланади.
Бундан ташқари, Айдар-Арнасой кўллар тизимида ташкил этиладиган дам олиш зонасида, Тўдакўл бўйида иш бошлаши кутилаётган ором ҳудудида ҳам хорижий сайёҳлар учун ўйин зоналарини яратиш кўзда тутилган. «Ўзбекистон 24» лавҳасида кўринган тақдимотларда ушбу режаларнинг амалга ошириш муддатлари кўрсатилмаган эди.
Маълумот учун, Ўзбекистонда азарт ўйинларга рухсат берилиши мумкинлиги ҳақида 2018 йилдан бери муҳокама қилинади. Хусусан, ўша йили Олий Мажлисга Мурожаатномасида Президент Шавкат Мирзиёев Қорақалпоғистонда азарт ўйинлар зонаси ташкил этилиши мумкинлигига ишора қилганди. Кейинроқ, 2019 йил февралида Бош прокуратура Мўйноқда казино (ўйин бизнеси)ни ташкил қилиш бўйича инвесторлардан таклиф тушганини тасдиқлаган эди.
2019 йил май ойида Ўзбекистон Туризмни ривожлантириш давлат қўмитаси Қорақалпоғистонда махсус ўйин зонасини ташкил этиш лойиҳасини қўллаб-қувватлашини билдирган, айни вақтда ушбу зона хорижликлар учун хизмат қилишини маълум қилган эди. Мўйноқ тумани ҳокими Ерпўлат Еденбаев 2020 йил январида «Дарё»га берган интервьюсида «казинолар қурилиши учун аввало қонунчиликка ўзгартириш киритиш керак»лигини таъкидлаган эди.
Изоҳ (0)