Австралиянинг Сидней шаҳри яқинидаги пляжлар тиббий ҳимоя ниқобларига тўлиб кетди. Ушбу ниқоблар юк кемасидаги контейнерларнинг сувга тушиб кетиши оқибатида пляжга йиғилиб қолган, деб хабар беради Daily Mail.
Маълумотларга кўра, мазкур юк кемаси Хитойдан Мельбурнга ҳимоя ниқобларини олиб келаётган бўлган. Бироқ кучли шамол ва тўлқинлар ичида юк бўлган 40 та контейнерга зарар етказиб, сувга тушириб юборган.
Ниқобларга биринчи бўлиб карантин чоралари енгиллаштирилгани сабаб дам олиш учун океан қирғоғига келган Сидней аҳолиси дуч келган. Улар бу ҳақда Австралия денгиз хавфсизлиги бошқармаси вакилларига маълум қилиб, ижтимоий тармоқларда пост қолдирган.
Пляжни ниқоблардан тозалаш ташаббусидан хабар топган маҳаллий аҳоли ўз хоҳишига кўра, қирғоққа тўпланган.
«Бир соат ичида юзлаб ниқоблар ва улар сақланган кичкина пластик контейнерларни йиғдим. Бу каби чиқиндиларга пакетларим тўлиб кетди», — дейди Алий Потт исмли кўнгиллилардан бири.
Нашрнинг ёзишича, юкдан айрилган кема капитани ортга қайтиб, Брисбенга йўл олиш бўйича қарор қабул қилган.
Юк кемаси эгасининг маълум қилишича, сувга тушиб кетган контейнерлар ичида маиший техника воситалари, қурилиш материаллари ва турли тиббиёт буюмлари ҳам бўлган.
Изоҳ (0)