Ўзбекистонлик футболчи Остон Ўрунов тўп тепаётган «Уфа» клубини «Манчестер Сити» хўжайинлари сотиб олиши мумкин

Россиянинг «Уфа» клуби хўжайинлари ўзгариши мумкин. Бу ҳақда «Он Эйр»га асосланиб «Чемпионат» хабар қилмоқда.

Таъкидланишича, рус клубига Red Bull компанияси ва «Манчестер Сити»га эгалик қилувчи City Football Group ҳолдинги даъвогарлик қилмоқда. Клуб бош директори Шамил Газизов биринчи вариантни маъқул кўрмоқда. «Уфа» раҳбарияти юқоридаги компаниялар вакиллари билан бир неча бор музокара ўтказган.

Эслатиб ўтамиз, «Уфа»да ўзбекистонлик футболчи Остон Ўрунов тўп суради. Остон қишда уфаликлар сафига бориб қўшилганди.

City Football Group «Манчестер Сити»дан ташқари «Нью-Йорк Сити» (АҚШ), «Мелбурн Сити» (Австралия), «Йокогама Маринос» (Япония), «Жирона» (Испания), «Мумбай Сити» (Ҳиндистон) ва бошқа бир қатор клубларга эгалик қилади. Red Bull ҳам дунё бўйлаб кўплаб клубларга эга, улардан энг машҳурлари — «РБ Лейпциг» ва «Руд Булл Зальцбург».

«Уфа» клубига 2009 йилда асос солинган, жамоа 2014/15 йилги мавсумдан буён Россия Премьер Лигасида ҳаракат қилади. РПЛ жорий мавсуми 22-туридан сўнг 9-ўринни эгаллаб турибди.