Дунёнинг энг яхши футбол академиялари ҳақида гап кетганда, биринчи бўлиб Ла Масия («Барселона») ва Ла Фабрика («Реал Мадрид») ёдга олинади. Лекин шундай академиялар борки, улар етук футболчиларни тарбиялашда испан грандларидан асло қолишмайди. Айнан шундай клубларидан бири, шубҳасиз, «Бавария»дир. Клуб академиясида ишлар тўғри йўлга қўйилгани боис жамоа кўп йиллардан бери Бундеслигада етакчиликни ҳеч кимга бермайди. Бунинг устига Германия терма жамоасини ҳам Мюнхен клуби тарбияланувчиларисиз тасаввур қилиш мушкул.
Қуйида мазкур академиянинг энг яхши битирувчилари ҳақида сўз юритилади.
Франц Беккенбауэр
Беккенбауэр, шубҳасиз, «Бавария»нинг барча даврлардаги энг яхши ўйинчиси ҳисобланади. Афсонавий «кайзер»нинг (кайзер – немис тилида император деган маънони англатади) ҳимоядаги ўйинлари таҳсинга лойиқ эди. Ҳимоячи бўлишига қарамай, унинг икки маротаба «Олтин тўп» совринини қўлга киритгани ҳам бежиз эмас. Бундан ташқари Беккенбауэрнинг ҳисобида бешта Германия чемпионлиги ва учта Еврокубок соврини бор. «Бавария» мухлислари ҳамон Беккенбауэрнинг ёрқин ўйинларини қўмсаётган бўлса ажаб эмас.
Филипп Лам
Филипп Лам ўз даврининг энг яхши ҳимоячиларидан бири сифатида фаолиятини якунлади. У 11 ёшида «Бавария» академиясига келади, 19 ёшга тўлганида эса асосий жамоага киришга муваффақ бўлади. Тўғри, бошланғич таркибдан жой олиши учун бироз сабр қилиши керак эди. Шу боис у турли жамоаларда ижарада юришга ҳам рози бўлди.
2005 йилга келиб, Лам ижарадан қайтди ва асосий таркиб ўйинчисига айланди. Кейин нима бўлгани ҳаммага аён – 517 та ўйин, 8 та чемпионлик, Чемпионлар Лигаси кубоги, УЕФА Суперкубоги ва, албатта, Жаҳон Чемпионатидаги ғалаба.
Лам Беккенбауэр каби ўз жамоасининг етакчиси, техникаси юқори ва тезкор ҳимоячи эди.
Бастиан Швайнштайгер
Бастиан Швайнштайгер – «Бавария» академиясида таҳсил олган яна бир афсона. Даставвал, Бастиан қанот футболчиси бўлган, аммо Арьен Роббен ва Франк Рибери сабаб позициясини ўзгартиради.
Швайни «Бавария»да дунёнинг энг яхши ярим ҳимоячиларидан бири эди – кўп қиррали, аниқ, тиришқоқ ва ҳужумкор. «Бавария» сафида 500 та ўйин ўтказиб, 68 бор рақиблар дарвозасини ишғол этган. Германия терма жамоасида ҳам у кўплаб совринларга эга чиқди.
Тони Кроос
Ажабланарлиси шундаки, «Реал» Тони Кроосни бор-йўғи 25 миллион евро эвазига сотиб олган. Мадрид клуби ҳали Кроос ўз жамоасининг афсонаси бўлишга улгурмасидан аввал уни қўлга киритишга муваффақ бўлганди. Шунга қарамай, Тони мюнхенликлар сафида 130 та ўйин ўтказган.
«Реал»да эса Кроос жамоанинг асосий ўйинчилардан бирига айланди ва у кетма-кет уч маротаба Чемпионлар Лигасида ғалаба қозонди. Тони ўзининг аниқ паслари, стандартлардан унумли фойдаланиши, тўп ва ўйинни аъло даражада назорат қилиши билан ажралиб туради.
Айни пайтда Кроос дунёнинг энг яхшилари қаторида.
Зепп Майер
Кўпчилик Оливер Канни «Бавария» тарихидаги энг яхши дарвозабон деб ҳисоблайди. Унга рақобат қилиши мумкин бўлган ягона посбон бу Мануэль Нойер. Бироқ Зепп Майерни ҳам бемалол бу икки етук дарвозабон қаторига қўшиш мумкин.
Унинг ақл бовар қилмас реакцияси ва тезлиги мухлис-у мутахассисларнинг олқишига сазовор бўларди. У ўз ҳудудининг қироли ва мухлисларнинг суюклиси эди. Майер бутун фаолиятини «Бавария»да ўтказди ва жами 536 та ўйинда майдонга тушди. Бу вақт ичида у жамоаси билан тўрт марта мамлакат чемпионатида ва уч марта халқаро мусобақаларда ғолиб бўлади.
Ханс-Георг Шварценбек
Ханс-Георг Шварценбек ҳам Беккенбауэр сингари Мюнхенда футбол сир-асрорларини ўрганади. Уларнинг ҳимоядаги жуфтлиги эса энг яхшилардан ҳисобланган.
Афсуски, «Кайзер»нинг ҳаддан зиёд машҳурлиги Шварценбекга бироз бўлса-да халақит берарди. Ҳатто уни «Беккенбауэрнинг тансоқчиси» деб аташган. Қайсидир маънода бунга асослар бор эди. Ўтиб бўлмас ва тиришқоқ ҳимоячи фаолиятини «Бавария»да бошлаб, ўша ерда тугатади. Германия чемпионатида олти бор, Еврокубокларда эса уч маротаба зафар қучади.
Томас Мюллер
Ҳозирги «Бавария»ни жамоа сафида 521 та ўйин ўтказган Томас Мюллерсиз тасаввур қилиш қийин. Бу вақт давомида Мюллер 195 та гол урди ва кўплаб совринларни қўлга киритди.
30 ёшли ҳужумчи кўп йиллардан бери жамоасининг асосий ўйинчиси бўлиб келмоқда. У тартибли, меҳнатсевар ва ватанпарвар футболчидир. Мюллер тактик жиҳатдан моҳир ўйинчи бўлиб, исталган ҳимоя чизиғини ожиз қолдиришга қодир.
Матс Ҳуммелс
Матс Ҳуммелс болалигидан «Бавария» тизимида бўлган. Мураббийлар унда ғайриоддий нимадир борлигини кўра олган ва унга имконият берган. Бироқ «Бавария» ўз тарбияланувчисини Дортмунднинг «Боруссия»сига сотишга қарор қилади. Ҳуммелс «Боруссия»да ҳам ўз ўрнини топади ва икки бор мамлакат чемпионлигига эга чиқади. Шундан сўнг у маълум муддат «Бавария»да ўйнайди ва у билан Бундеслигада уч марта ғолиб бўлади. Айни пайтда эса у яна «Боруссия»да тўп сурмоқда.
Ҳуммелснинг бошқалардан ажралиб турадиган жиҳатлари – иккинчи қаватдаги устунлик, «подкат» ва тўғри позиция танлай олишдир.
Бошқа мақолалалар:
- Сульшердан Левандовскигача. Футбол тарихига кирган 7 алмаштириш ҳақида
- Уолкоттдан Уилшергача. Ишончни оқламаган инглиз футболи вундеркиндлари ҳақида
- «Аборт қилдирмоқчи бўлганман, бироқ Худо Криштианунинг туғилишини хоҳлаган». Роналдунинг онаси ҳақида кичик ҳикоя
- Ким қаерга ўтади? Погба, Ндомбеле, Обамеянг ва бошқа юлдузлар учун танлов имконияти
- «Сантьяго Бернабеу»даги кечиккан дебют, «Барселона»дан кетиши ва орзулари ҳақида «япон Мессиси» билан интервью
- 38 йилдан бери давом этаётган кома. Франциялик собиқ футболчи ва унга содиқ қолаётган аёл ҳақида ҳикоя
- «Агар онам бўлмаганида футболни аниқ ташлаб кетардим». Анхель ди Мариянинг таъсирли ҳикояси
- Лаутаро ёки Неймар? «Барселона»га ким кўпроқ зарур?
- Стол тенниси туфайли футболдан воз кечишига бир бахя қолгани, ўз отаси билан судлашув, ирқчилик сабаб Германия термасидан кетгани ҳақида Месут Ўзил интервьюси
- Топ-10: Карвахалдан Александер-Арнольдгача. Дунёнинг энг яхши ўнг қанот ҳимоячилари
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)