Шавкат Мирзиёев Тошкент шаҳрида Оҳангарон шоссеси ва Махтумқули кўчаси кесишмасидаги йўл ўтказгични кўздан кечирди, дея хабар берди Президент матбуот хизмати.
Хабарда қайд этилишича, охирги уч йилда Тошкент шаҳрида енгил автомобиллар сони 95 мингтага кўпайган ва ҳудудлардан пойтахтга келиб-кетаётган машиналар сони ҳам ошмоқда.
Кўчаларнинг ўтказувчанлигини ошириш, тирбандликларни камайтириш мақсадида ўтган 3 йилда 4 та йўл ўтказгич кўприк қурилиб, фойдаланишга топширилган.
Оҳангарон шоссеси Тошкент ҳалқа йўлининг бир қисми. Махтумқули кўчасининг янги қисми битказилгач, ушбу йўлларда транспорт ҳаракати янада ортган эди. Ушбу кўчалар кесишмасида 2018 йилда бошланган лойиҳа бу йил рўёбга чиқди.
Мазкур транспорт ечими уч поғонадан иборат бўлиб, туннель узунлиги 593 метр, ҳалқа шаклидаги ўрта поғона 29 метр, эстакада қисми 502 метрни ташкил этади. Туннель ва эстакадада қатнов олти, ўрта поғонада эса беш қаторли.
Илгари бу чорраҳа соатига 7 минг автомашинани ўтказиш қувватига эга эди. Энди соатига 20 мингта транспорт воситасини узлуксиз ўтказиш имконияти пайдо бўлди. Бу ерда светофор ишлатилмаслиги ҳам тўхтовсиз ҳаракатни таъминлайди.
Яна бир жиҳати — бу янги объект катта юкламани ўзига олиб, Тошкент—Чимён йўналиши бўйича масофа 22 километрга қисқарди.
«Пойтахтда енгил автомобиллар сони янада кўпайиши аниқ. Шунинг учун эртанги кунни олдиндан кўриб, кўчаларни кенгайтириш, кўприклар қуриш ишларини давом эттириш керак», — дея таъкидлаган Шавкат Мирзиёев.
Объектда 170 та энерготежамкор ёритиш устуни ўрнатилган, атрофдаги 15 минг квадрат метр майдон ободонлаштирилган.
Аввал Шавкат Мирзиёевнинг Адиблар хиёбонида очилган Тошкент шаҳри музейини кўздан кечиргани, Яшнободдаги қиймати 130 миллион доллардан зиёд бўлган болалар миллий тиббиёт маркази билан танишгани хабар қилинган.
Изоҳ (0)