Канададаги зирҳли автомобиллар ишлаб чиқаришга ихтисослашган Inkas ательеси янгиланган Infiniti QX80’нинг ўқ ўтмайдиган версиясини тақдим этди. Йўлтанламас BR6 стандарти бўйича баллистик ҳимояга эга ҳашаматли автомобилга айлантирилган, деб хабар беради Motor.
Торонтодаги устахона янги зирҳли машинанинг асоси сифатида 400 от кучига эга 4,6 литрли V8 атмосфера двигатели ўрнатилган Infiniti QX80’дан фойдаланган. Ҳимояланган йўлтанламасни оддий QX80’дан деярли ажратиб бўлмайди: қалин ойналар фарқни билдиради холос.
Infiniti 7,62 калибрли ўққа, шунингдек, иккита DM51 қўл гранаталари портлашига бардош бера олиши учун Inkas мутахассислари машина салонини капсулага айлантирган. Амалга оширилган ишларни бешинчи эшикни очиш орқали кўриш мумкин: орқа эшик ортида худди сейфники каби яна бир эшик жойлашган.
Inkas ательеси QX80’нинг оғирлиги қанчага тенглиги ҳақида маълумот бермаган, бироқ таъкидланишича, эшик илгаклари кучайтирилган, чидамкор тормозлар ўрнатилган, электрон қурилмалари, аккумулятор ва двигатели қўшимча ҳимояланган. Бундан ташқари, йўлтанламасга махсус шиналар «кийгизилган».
Йўлтанламас салони тўрт кишига мўлжалланган. Интерьери қора чарм ва ёғочдан ишланган, олд ўриндиқларнинг бош қўядиган қисмига мониторлар ўрнатилган. Шунингдек, овоз-сигналли қурилма, ўт ўчирувчи тизим, ҳужум вақтида атрофдагиларни ўзига жалб этишга мўлжалланган сирена мавжуд.
Зирҳли машинанинг нархи ҳозирча эълон қилинмаган, бироқ у одатдаги QX80’дан камида икки баробарга қиммат бўлиши аниқ. АҚШда QX80 тахминан 91,5 минг доллар туради, шу сабабли ҳимояланган йўлтанламас нархи 200 минг доллар атрофида бўлиши кутилмоқда.
Изоҳ (0)