Киприклар, соч толалари каби янгиланиб туриши, яъни тўкилгани ўрнига янгиси чиқиши табиий ҳол. Кунига ўртача 3-5 та киприк тўкилиши нормал ҳолат, аммо ундан кўпроқ кузатилса, бунга бефарқ бўлиш керак эмас. Harper’s Bazaar нашри киприкнинг одатдагидан кўп тўкилишининг 5 сабаби ва бунда нима қилиниши кераклигига тўхталди.
Қўл билан кўзга тегиниш
Статистика маълумотларига кўра, бир соат ичида кўзларга қўл билан 12 мартадан 20 мартагача тегилади. Бу нафақат кўзга микроб кириши, балки киприк фолликулаларининг шикастланишига ҳам сабабчи бўлади. Агар киприк сунъий йўл билан ва одатдагидан аввал тўкилса, унинг ўрнига янгиси ўсмаслиги эҳтимоли бор.
Нотўғри косметик воситалардан фойдаланиш
Кўз учун ишлатиладиган ва макияжни ўчиришда фойдаланиладиган косметик воситалар киприклар ҳолатига яхшигина таъсир кўрсатади. Шу боис бўлса керак мутахассислар кундалик макияж учун сувга чидамли тушлардан фойдаланмасликни тавсия қилади. Бундай тушларнинг ўчиши қийинлиги ҳисобига ювиш вақтида киприклар шикастланади.
Киприк қайиргичдан фойдаланиш
Узун ва қайрилган киприклар ҳамманинг орзуси, лекин бу ҳар куни табиатан тўғри киприкларни қайиртириб, уларни шикастлаш керак дегани эмас. Гап шундаки, қайиргич киприкларни сунъий равишда тўкиб, илдизларига шикаст етказади. Киприксиз қолишни истамасангиз, ундан фақат муҳим учрашув ва маросимларда фойдаланинг.
Улама киприклар
Нотабиий ва қалин қилиб уланган сунъий киприклар табиий киприкларга зарар етказади, фолликулаларга ортиқча юк бўлиб, уларни шикастланишига олиб келади.
Нима қилиш керак?
Киприк учун мўлжалланган ёғлардан фойдаланинг. Киприкларни тиклайдиган, мустаҳкамлайдиган ва узунлаштирадиган, бир қанча табиий воситалар мавжуд. Косметологлар витамин E, омега-3 ёғ кислоталарига бой, киприк илдизини мустаҳкамловчи ва ўстирувчи хусусиятга эга канакунжут мойидан фойдаланишни тавсия қилади.
Озиқлантириш
Киприкларни нафақат ташқи, балки ички томондан ҳам озиқлантириш кераклигини ёдда тутинг. Шундай экан таомномангиздан А, B7, ва E витаминларига бой маҳсулотлар ўрин олиши керак. Балиқ маҳсулотлари, ёнғоқ, ўсимлик ёғи, кўкат ва сабзавотлар, шунингдек, донли маҳсулотларни истеъмол қилинг.
Киприк фолликулаларини шикастламанг
Юқорида таъкидланган барча омиллар киприк фолликулаларига шикаст етказади ва бунинг оқибатида киприклар тўкилиши, бошқа ўсмаслиги мумкин. Шундан келиб чиқиб одатларингизни ўзгартиринг.
Изоҳ (0)