Суд iPhone қурилмалари ишини «сирли равишда секинлаштириш»да айбланаётган Apple ўз фойдаланувчиларига 500 миллион доллар компенсация тўлаш борасидаги истагини маъқуллади, деб хабар беради IXBT.
Округ суди Эдвард Ж.Дэвил бу борадаги дастлабки розиликни берган, бироқ якуний муддатни пандемия сабаб узайтириш ниятида эканлигини маълум қилган. Apple ҳуқуқшуносларига вазиятни тартибга солиш бўйича янги муддатни таклиф этиш топширилган, тахминларга кўра, бу декабрга тўғри келади.
Агарда келишув маъқулланса, у Apple’га қарши илгари сурилиб, 2018 йилнинг майида ягона гуруҳ даъвосига бирлашган ўнлаб суд даъволарига якун ясайди. Apple’га қарши даъво аризалари компания iPhone смартфонлари ишини секинлаштирувчи дастурий таъминотни чиқарганини тан олганидан сўнг берилган эди. Эски модель тўсаддан ўчиб қолмаслиги учун уларнинг иш қобилияти ва аккумулятор тежамкорлиги пасайтирилган.
Охир-оқибат Apple фойдаланувчиларни огоҳлантирмагани учун кечирим сўраган ва аккумуляторларни алмаштириш бўйича дастурни ишга тушириб, унинг нархини 29 доллар этиб белгилаган. Компания iOS 11.3 версиясида фойдаланувчилар ўз батареяларининг ҳолатини кўришга имкон берадиган, шунингдек, ишчанлик қобилиятини пасайтириш функциясини ўчириб қўядиган янгиликни тақдим этган.
Келишув маъқулланадиган бўлса, жабр кўрган ҳар бир iPhone эгасига 25 доллардан компенсация тўланади. Якуний маблағ мурожаатчиларнинг сонига қараб ортиши ёки камайиб кетиши мумкин.
Гап iPhone 6, 6 Plus, 6s, 6s Plus, 7, 7 Plus ва SЕ смартфонлари ҳақида кетмоқда.
Изоҳ (0)