Ўзбекистонда 14 май соат 15:00 ҳолатига кўра коронавирус инфекциясини юқтириб олганлар сони 16 кишига ошиб, 2636 нафарни ташкил этмоқда. Бу ҳақда Соғлиқни сақлаш вазирлиги хабар берди.
Маълум қилишларича, 16 та янги касалланиш ҳолатининг 6 таси хориждан келиб, карантинга олинган, қолган 10 таси ҳам олдиндан карантин муассасаларида кузатувда бўлган фуқаролар орасидан аниқланган. Хориждан келиб, касалланиш қайд этилган фуқароларнинг 5 нафари халқаро юк ташувчи автомашина ҳайдовчиси бўлса, 1 нафари эса Қозоғистондан келган.
Қўшимча қилинишича, даволанаётган 489 нафар бемордан 11 нафари оғир аҳволда.
Аввалроқ, 14 май соат 10:00 ҳолатига кўра жами касалланиш ҳолатлари сони 2620 тага етгани, даволанишда бўлган жами 533 нафар беморнинг 11 нафари оғир аҳволда эканлиги маълум қилинган.
Маълумот учун, 14 май ҳолатига кўра Ўзбекистонда коронавирус инфекциясидан соғайганлар сони 2136 нафарга етган, инфекция асоратлари оқибатида 11 киши вафот этган.
Изоҳ (0)