Фарғона вилоятида 13 май куни олти нафар коронавирус инфекциясига чалинган бемор тузалиб чиқди. Бу ҳақда Ўзбекистон Соғлиқни сақлаш вазирлиги хабар берди.
Тузалиб чиққанларнинг уч нафари Туркиядан, бир нафари Россиядан келган ва карантинга олинган. Касаллик аниқлангач шифохонага ётқизилган. Қолган икки нафари касалликни коронавирусга чалинганлар билан мулоқотда юқтириб олган.
Уларнинг икки нафари эркак, тўрт нафари аёл. Ҳудудлар кесимида кўриб чиқилса, уч нафари Фарғона вилоятидан, қолган уч киши Қорақалпоғистон, Андижон ва Намангандан. Энг каттаси 54 ёшда, энг кичиги 23 ёшда.
Шундай қилиб, Фарғона вилоятида коронавирусдан соғайганлар сони 156 нафарга етди. Соғлиқни сақлаш вазирлигидан маълум қилишларича, ҳозирда вилоятда коронавирусга чалинган бир бемор қолмоқда.
«Яъни, водий вилоятлари ичида Фарғона коронавирусдан ҳоли ҳудуд бўлишга жуда яқин турибди», — дейилади ССВ ахборотида. Умуман, Ўзбекистон бўйича коронавирусдан соғайганлар сони 2046 нафарга етди.
Маълумот учун, Ўзбекистонда 13 май соат 10:00 ҳолатига кўра коронавирусга чалинганлар сони 2568 нафарга етди; ўтган давр мобайнида 10 нафар бемор инфекция асоратлари оқибатида вафот этди.
Изоҳ (0)