Ўзбекистон Президенти Шавкат Мирзиёев 7 май куни Тожикистонга 144 та мобил тиббиёт контейнерларини юбориш бўйича мамлакат ҳукуматига топшириқ берди. Коронавирусга чалинган беморларни жойлаштириш ва даволашга мўлжалланган контейнерлар темир йўл орқали 8 май куни эрталаб Душанбе шаҳрига етказилди, деб хабар беради Asia-Plus.
Бу каби контейнерлардан коронавирус пандемияси вақтида мобил госпитал сифатида фойдаланилмоқда.
«Улар касаллар учун жой етмаётган шифохоналарнинг юкламасини камайтиришга хизмат қилади», — дейди Ўзбекистоннинг Тожикистондаги дипломатик ваколатхонаси.
Таъкидланишича, контейнерлар «Бофанда» стадионига етказилади ва ўша ерда мобил шифохона ташкил этилади.
Аввалроқ Душанбе мэри Рустам Эмомали шаҳарда қурилиши битмаган биноларни госпиталга айлантириш бўйича кўрсатма берган эди. Гап пойтахтдаги ҳали қурилиши якунига етмаган иккита бино ҳақида кетмоқда, у 800 нафаргача беморни қабул қила олади.
Шунингдек, Ўзбекистон Президентининг топшириғига кўра, Мудофаа вазирлиги ҳарбий-транспорт самолётлари орқали Душанбега навбатдаги гуманитар ёрдам ҳам етказилган.
Маълумотларга кўра, Тошкентдан учадиган ҳарбий-транспорт самолёти Душанбега 10 дона сунъий нафас олдириш аппарати, дори воситалари, ҳимоя халатлари, қўлқоплар ва респираторлар олиб боради. Бундан ташқари, мазкур самолёт билан коронавирусга қарши курашда тажрибага эга саккиз нафар ўзбек вирусолог ва эпидемиологи ҳам учиб боради.
«Улар Тожикистон Соғлиқни сақлаш вазирлиги кўрсатган шифохоналарда зудлик билан иш бошлайди», — дейилади хабарда.
Мавзуга доир:
Маълумот учун, Тожикистонда 7 май ҳолатига кўра, коронавирусга чалинганлар сони 461 кишини ташкил этмоқда. Жаҳон банки Тожикистонда 21 минг нафар одам коронавирусдан вафот этиши мумкинлигини тахмин қилган.
Изоҳ (0)