АҚШ ҳукумати, Халқаро тараққиёт агентлиги (USAID) қошидаги Табиий офатларда ёрдам кўрсатиш бошқармаси орқали, Сирдарё вилоятининг Сардоба туманидаги тошқин оқибатида жабр кўрган аҳолига кўмак бериш учун 100 минг доллар ажратмоқда. Бу ҳақда АҚШнинг Тошкентдаги элчихонаси матбуот хизмати хабар берди.
Таъкидланишича, АҚШ ҳукумати бу маблағдан фойдаланиб сув омбори ўпирилиши натижасида ўз уйларидан кўчирилган муҳтож оилаларга озиқ-овқат ва бошқа зарур воситаларни тарқатиш орқали Ўзбекистонга мазкур инқироздан қутулиш ва қайта тикланишда ёрдам беради.
«Сирдарё вилояти аҳолисига чин дилдан ҳамдардлик билдираман. Ўзбекистон ҳукумати ва фуқаролари ушбу фалокат оқибатларини бартараф этиш учун тезда сафарбар этилди. АҚШ ҳукумати бу офатдан зарар кўрган оилаларни қўллаб-қувватлашдан фахрланади», — деди АҚШ элчиси Дэниел Розенблюм.
Фавқулодда кўмак бўйича саъй-ҳаракатларни қўллашдан ташқари, USAID Ўзбекистон ҳукумати билан мамлакат иқтисодини диверсификациялаш, минтақавий савдони кучайтириш, соғлиққа жиддий таҳдидларни бартараф этиш ҳамда аҳоли эҳтиёжларини қондириш учун ҳукумат имкониятларини шакллантириш бўйича ҳамкорлик қилади.
Апрель ойининг ўрталарида USAID Ўзбекистонга 400 минг доллар қийматдаги 131 320 килограмм хавфсиз озиқ-овқат маҳсулотларини инсонпарварлик ёрдами сифатида тақдим қилганди. Ушбу ижтимоий ёрдам Ўзбекистонда 35 минг нафарга яқин кам таъминланган аҳолининг эҳтиёжларига сарфланиши ва 144 та ижтимоий ҳимоя ва соғлиқни сақлаш муассасаларига тарқатилиши маълум қилинганди.
Эслатиб ўтамиз, Алишер Усмонов Сардобадаги фалокатдан жабр кўрганлар учун 15 миллион доллар хайрия қилди. Ушбу маблағнинг 10 миллион доллари ўзбекистонликларга ёрдам учун, 5 миллиони эса Қозоғистоннинг Туркистон вилояти Мақтараал тумани аҳолиси учун тақдим этилган.
Гурбангули Бердимуҳамедов Ўзбекистонга Сардоба фалокатидан зарар кўрган ҳудудларни тиклашда зудлик билан ёрдам беришга тайёрлигини билдирганди.
Шунингдек, Ўзбекистон Президенти ташаббуси билан ташкил этилган «Саховат ва кўмак» умумхалқ ҳаракати доирасида Сардобадаги фалокатдан жабр кўрганларга ёрдам бериш учун «Саховат карвон»лари жўнатилмоқда. Хусусан, Тошкент, Андижон, Самарқанд, Фарғона, Қашқадарё вилоятларидан тошқиндан жабрланган сардобаликлар учун инсонпарварлик ёрдами юборилди.
Изоҳ (0)