Таиландлик балиқчилар Сиам қўлтиғида сузиб юрган камёб пушти дельфинларни видеога олишга муваффақ бўлди, деб хабар қилади Reuters.
Олимларнинг сўзларига кўра, дельфинлар коронавирус пандемияси сабаб туристлар камайиб кетгани учун қирғоқлар яқинига қўрқмасдан сузиб келмоқда.
«Мен жуда ҳам ҳайратга тушдим, чунки ҳеч қачон пушти дельфинни кўраман деб ўйламагандим», — дейди Чаёт Саэдан исмли балиқчи.
Таиланд пушти дельфинлари Халқаро табиатни муҳофаза қилиш иттифоқининг камёб турлар рўйхатига киритилган. Пҳукет денгиз биология маркази директори Конгкиата Киттиватанавонгнинг сўзларига кўра, Сиам қўлтиғида бу турдаги дельфинларнинг 150 яқини яшайди.
Таъкидланишича, Таиландда 2020 йилнинг март ойида туристлар сони ўтган йилнинг шу даврига нисбатан 76 фоизга камайиб кетган.
Апрель ойининг охирларида Истанбулдаги энг машҳур диққатга сазовор масканлардан бири бўлган Ўртакой масжидининг яқинидан оқиб ўтувчи сувда дельфинлар пайдо бўлгани ҳақида хабар берилганди.
Таъкидлаш керакки, кўплаб одамлар карантинда бўлганлиги сабаб ҳайвонлар олдинлари боришга қўрққан жойларига келишни бошлаган. Масалан, Аргентинадаги Мар-дель-Плата курорт шаҳри кўчаларида денгиз арслонлари пайдо бўлган бўлса, пингвинлар бўшаб қолган Кейптаун кўчаларини ўзлариники қилиб олган. Гватемала жунглиларига эса ягуарлар қайтиб келган.
Изоҳ (0)