Хитой 2019 йилнинг охирларида Ухань провинцияси тарқалган янги турдаги COVID-19 коронавирус инфекциясига оид далилларни қасддан йўқ қилиб юборган. Бу ҳақда АҚШ, Буюк Британия, Канада, Австралия ва Янги Зеландия махсус хизматларини бирлаштирувчи «Беш кўз» разведка альянси томонидан тайёрланган 15 варақли ҳисоботга таяниб, The Daily Telegraph хабар берди.
Ҳужжатда таъкидланишича, Хитой ҳукумати коронавирус пайдо бўлишига оид ҳар қандай маълумотни яшириб, шу орқали бошқа мамлакатларни хавф остига қўйган. Шунингдек, маълумотларга кўра, Хитой COVID-19 борасида лабораторияларда ўтказилган тажрибаларга оид далилларни ҳам йўқ қилиб, вакцина яратиш устида иш олиб бораётган хорижлик олимларга биоматериалларни тақдим этишдан бош тортган.
Ҳисобот муаллифларининг фикрича, Пекинда ўтган йилнинг декабрь ойи бошида инфекциянинг одамдан одамга юқиши борасида далиллар бўлган, бироқ буни 20 январга қадар яшириб келган. Ҳужжатга кўра, 3 январь куни Хитой Соғлиқни сақлаш миллий комиссияси коронавирус намуналарини йўқ қилиш ва номаълум инфекцияси ҳақида маълумотларни эълон қилмаслик бўйича кўрсатма берган.
Daily Telegraph’нинг ёзишича, ҳисоботда Ухань институтидан бўлган доктор Ши Чжэнли бошчилигидаги вирусолог олимлар гуруҳи ҳақида сўз боради. Улар 2013 йил Юньнань провинциясидаги ғорларда кўршапалак ахлатлари устида тадқиқот олиб борган. Аниқланишича, намуналар 96,2 фоиз COVID-19 коронавирус инфекциясини келтириб чиқарувчи SARS-CoV-2 вирусига ўхшаш. Бундан ташқари, олимлар SARS коронавирусларининг синтези устида тақдиқот ўтказиб, у кўршапалакдан сутэмизувчиларга юқиши мумкинлигини таҳлил қилган. 2015 йилнинг ноябрида Шимолий Каролина университети билан биргаликда ўтказилган тадқиқотлар натижасида, SARS’га ўхшаш ушбу вирус кўршапалаклардан одамга тўғридан-тўғри юқиши ва уни даволаб бўлмаслиги аниқланган.
Орадан бир неча йил ўтгач, 2019 йилнинг мартида доктор Чжэнли ва унинг жамоаси, хусусан, Австралияда беш йил давомида ишлаган Пэн Чоу тиббиёт журналларининг бирида Bat Coronaviruses («Кўршапалаклар коронавируси») номли мақола эълон қилган. Унда олимлар «вирусларнинг қайноқ нуқталари ва уларнинг турлараро потенциал тарқалиши» ҳақида ёзиб, ўз ишларини «Хитойдаги кўршапалаклар коронавирусини ўрганиш орқали навбатдаги касаллик тарқалиши хусусиятини тушуниш» дея изоҳлаган. Мақолада шундай дейилган: «SARS ёки MERS каби коронавируслар келажакда кўршапалаклардан тарқалади ва бу Хитойда содир бўлишнинг юқори эҳтимоллиги мавжуд».
Аввалроқ АҚШ президенти Дональд Трамп Пекинни коронавирусга оид фактларни яширгани учун жавобгарликка тортишга ваъда берган эди. Миссури штати бош прокурори эса коронавирус сабаб Хитойни судга берганди.
Изоҳ (0)