Ҳиндистоннинг Оллоҳобод шаҳрида яшовчи эркак карантин пайтида Мумбайдан уйига етиб олиши учун ўзини пиёз сотувчиси қилиб кўрсатди, деб ёзади CNN.
Ҳиндистонда қатъий тартибда карантин жорий этилганига қарамай озиқ-овқат маҳсулотлари ортилган транспорт воситаларига штатлар ўртасида ҳаракатланишга рухсат берилган.
Мумбай аэропорти ходими Прем Мурти Пандей озиқ-овқат бозоридан 28 тонна пиёз сотиб олган. У пиёз сотувчиси сифатида чегарадан ўтиш учун ижарага юк машинаси олган ҳамда ҳайдовчи ёллаган.
Эркак уч кун деганда 1400 километр масофани босиб ўтиб, Оллоҳободга кириб борган. Йўл-йўлакай у учта штат ҳудудидан ўтган.
Қайд этилишича, Оллоҳободдаги полициячилар Пандейнинг режасидан хабар топиб, уни карантинга жойлаштирган.
«Унда касалликнинг ҳеч қандай аломатлари йўқ. Шундай бўлса ҳам хавфсизлик нуқтаи назаридан у карантинга жойлаштирилди», — дейди маҳаллий полиция вакили Арвинд Кумар Сингҳ.
Изоҳ (0)