Чирчиқ шаҳрида 21 апрель куни пиёданинг ўлими билан боғлиқ йўл-транспорт ҳодисаси юз берди, дея хабар бермоқда ИИВ Йўл ҳаракати хавфсизлиги бош бошқармаси.
Хабар беришларича, соат тахминан 11:30 да Алишер Навоий кўчасидаги «Барбадос» ошхонаси олдида йўлни белгиланмаган жойдан кесиб ўтаётган 60 ёшли пиёдани Nexia-3 автомобили уриб юборган.
«Пиёда зудлик билан Қибрай туман касалхонасининг жонлантириш бўлимига олиб борилган, аммо унинг ҳаётини сақлаб қолиш имкони бўлмаган», — дейилади ИИВ ЙҲХББ ахборотида.
Қайд этишларича, Чирчиқ шаҳар ИИБ ҳузуридаги Тергов бўлими томонидан мазкур ҳолат юзасидан суриштирув олиб борилмоқда.
Аввалроқ Дўстликда ишончномаси ва стикери бўлмаган ҳайдовчи 50 ёшли пиёдани уриб юборгани, Зангиотада 33 ёшли пиёдани уриб юборган ҳайдовчи воқеа жойидан қочиб кетгани, Бойсунда Nexia автомобили 28 ёшли чўпон ва 31 та қўй-қўзини уриб кетгани ҳақида хабар берилган эди. Ҳар учала ҳолатда ҳам жабрланувчилар вафот этган.
Изоҳ (0)