«ВАЗ-2101» — 50 ёшга тўлди. Афсонавий «Жигули» тарихи суратларда

Бундан 50 йил олдин, 1970 йили 19 апрелга ўтар кечаси Тольятти автомобиль заводида Собиқ Иттифоқ даврининг энг машҳур автомобилларидан бирини ишлаб чиқариш йўлга қўйилган эди. «Копейка»нинг биринчи авлодлари 1970 йилдан 1988 йилга қадар ишлаб чиқарилган: бу давр оралиғида моделнинг 4,8 миллион ортиқ нусхаси сотилган. «ВАЗ-2101» ўз тарихи давомида ўн мартадан ортиқ модификацияга учраган бўлиб, версиялари орасида махсус хизмат, пойга моделлар, шунингдек, экспорт нусхалари ўрин олган. Motor ушбу моделнинг юбилейи муносабати билан «ВАЗ-2101»га оид маълумотларни тўплаб тақдим этди.

1966 йилнинг 16 август куни Москвада илмий-техник ҳамкорлик доирасида енгил автомобилларни йиғиш бўйича Италиянинг Fiat компанияси ҳамда Совет Ташқи савдо вазирлиги ўртасида битим имзоланган.

Мазкур битим доирасида СССР ҳудудидаги автомобиль заводларида ишлаб чиқариладиган моделлар ҳам келишиб олинган. Унга кўра, седан («ВАЗ-2101») ва универсал («ВАЗ-2101») кузовли «норма» моделлари, шунингдек, «люкс синфига оид машина» — «ВАЗ-2103» ишлаб чиқариладиган бўлган.

«ВАЗ-2101»нинг дастлабки партиясидаги тўртта қизил ва иккита кўк автомобиллар 1970 йилнинг 22 апрель куни конвейрдан чиққан. Айнан ушбу кунда В.И.Лениннинг юз йиллик юбилейи нишонланган. Модель Fiat-124 асосида яратилган бўлиб, аввалига тўлиқ Италиядан келтирилган таркибий қисмлардан йиғилган.

Шунга қарамай, «ВАЗ-2101» техник жиҳатдан хориж автомобилининг нусхаси бўлмаган. Базавий моделга жами 800 дан ортиқ ўзгартириш киритилган. Совет муҳандислари томонидан синовдан ўтказилган Fiat, иттифоқ йўлларига бардош бера олмаслигини кўрсатган.

Хусусан, машина СССРнинг иқлими ва йўлларига мосланган бўлиб, янги двигатели билан фарқ қилган. Бундан ташқари, муфта қисми кучайтирилган, орқа диск тормозлари «барабанлар»га алмаштирилган.

«Жигули» номи 1968 йили «Рулда» журнали томонидан эълон қилинган танлов натижасида пайдо бўлган. Нашриётга жами 55 мингга яқин автомобиль номлари юборилган бўлиб, экспертлар комиссияси улар орасидан 1812 тасини танлаб олган. «ВАЗ-2101» номи «Бинафша», «Қирғий» ёки «Орзу» деб ҳам аталиши мумкин эди.

Охир-оқибатда Тольятти яқинидаги тоғ тизмаси шарафига қўйилган «Жигули» номи ғолиб чиққан. «Копейка» номини эса автомобиль 1990 йиллар охирида, модель номерининг охиридаги бир рақами сабаб олган.

1971 йилдан бошлаб конвейрдан «ВАЗ-2102» чиқа бошлаган. Дизайни жиҳатидан Fiat каби бўлса-да, модель асосини моденизациялашган «копейка» ташкил этган.

«Люкс» «ВАЗ-2103» 77 от кучига эга 1,5 литрли двигатель билан жиҳозланган бўлиб, машина 100 км/соат тезликка 15 сонияда чиқа олган.

1973 йил 18 октябрда СССР Давлат стандарти қўмитаси «ВАЗ-2101»га Давлат сифат белгисини топширган. «Жигули» ушбу мукофотга сазовор бўлган илк совет автомобили ҳисобланади.

Коронавирус пандемияси сабаб «АвтоВАЗ» «ВАЗ-2101»нинг юбилейига бағишланган тадбирларни бекор қилди. Хусусан, Россия президенти Владимир Путиннинг «Копейка» музейи очилишига ташрифи ҳам қолдирилган.